ВМРО-ДПМНЕ, денеска, со свечен настан на Кејот 13 Ноември кај Камениот мост, ги одбележа 23 Октомври, Денот на Македонската револуционерна борба и јубилејот, 130 години ВМРО. Настанот насловен „Традиција која обврзува за иднина која доаѓа“, го организираше партискиот Патриотски институт „Гоце Делчев”.
Чествувањето почна со интонирање на партиската и државната химна, како и со изведба на народни песни и ора, по што, пред присутните, се обратија претседателот на ВМРО-ДПМНЕ, Христијан Мицкоски и претседателот на Патриотскиот институт, Александар Пандов.
Мицкоски потенцира дека делото на револуционерите мора да се почитува, но и да продолжи преку спроведување на мисијата и целите за демократска и просперитетна држава. Земјава денес, како што истакна, е исправена пред многу предизвици, а состојбата е „потполно алармантна и на повеќе полиња катаклизмична“. Тој обвини дека денешниот празник „срамежливо се одбележува од официјалните власти“, како и дека „оваа власт си поигрува со сѐ што е наследено“.
Се осврна и на владеењето на правото кое мора да биде, напомена, неселективно, но зборуваше и за идните активности на партијата.
Пораката на Мицкоски беше дека мора да има промени.
„Денес се празнува почетокот на организираниот отпор на македонскиот народ кој низ жестока битка ја донесе слободата што ја живееме денес. Прашуваат што е толку свето во тие идеи, зошто толку се поклонуваме пред овие настани, херои и паднати животи? Затоа што во срцето на таквиот конпцет секогаш била, е и ќе продолжи да биде Македонија. Но, денес, мисијата и целите не се завршени. Дел од тие цели – како да се брани наследената слобода, утврдениот идентитет, како да се направи отпор кон туѓите пропаганди, се сѐ уште актуелни и денес. Имаме и поинакви цели кои мораме да ги сработиме. ВМРО е традиција која обврзува, мора да се избориме за иднината која доаѓа. Состојбата во Македонија е потполно алармантна и на повеќе полиња катаклизмична. Не се предизвик само ударите по идентитетот, туку и ударите по џебот на народот. Гладот и сиромаштијата се уште поголема закана за иднината на Македонија. Во земјава на крајот на годината ќе има околу 600.000 луѓе кои ќе живеат во сиромаштија, што е секој трет човек, со само 60 денари на ден преживуваат 80.000 граѓани, а со 150 денари 600.000 граѓани“, рече Мицкоски.
Според него, ако не си ги почитуваме нашите предци, нашето минато и историја, никако не можеме да одиме напред.
„ВМРО секогаш обединувало – леви и десни, сиромашни и богати, интелектуалци, земјоделци, работници. Организацијата била поголема од секој поединечен интерес. Денес, никој нема право да става рака и да присвојува делови од неа, прикажувајќи ги како исклучиво свои, особено не некој од соседите, ниту некој однатре смее да фрла стигми и да развива стереотипи. И тогаш кога делувала жестоко, ВМРО имала крајна цел – слобода на Македонија. Чувството кое сакаат денес да го наметнат на мал и обесхрабрен наорд, на луѓе кои мора да молат за својата иднина, е само сликата со која сакаат да го скршат нашиот непоколеблив дух кој победувал многу поголеми предизвици. Но, организацијата е жива и нејзините цели се живи, а сите ние, не само што се поклонуваме на тоа дело, туку имаме и обврска да го продолжиме само поради Македонија“, порача Мицкоски.
Тој потсети дека револуционерите Питу Гули загина на 38 години, Гоце Делчев на 31 година, а животот на Христо Узунов згасна, како што нагласи, на 27 години.
„Со мачнина гледам кога ваква македонска историска драма од која речиси секој сосед сака да приграби малку, малку срамежливо се одбележува од официјалните власти. Не се работи за некоја голема промисленост или стратегија, туку за ситнодушност која не им дозволува да видат дека ВМРО е на секој Македонец. Тоа нивно однесување не е репер, зашто тие и од асномското партизанско движење се откажаа. Оваа власт тотално го заборави и маргинализира и си поиргува со сѐ што е наследено. Кога дојдоа на власт и се колнеа во слоганот „Нема правда, нема мир“ кој не само што не го спорведоа, туку и самите го испоганија, воведоа колетивно беснило и лудило на деструкција. Денес ќе бевме многу посреќни ако изградеа уште театри, музеи и ако отвореа фабрики. И не е само тоа, таа автодеструкција која боли, туку и молчењето пред претензионистичките изјави со кои удираат пред нашите идентитетски основи кога од соседите сакаат да ни приграбат сѐ што нам ни е свето, а власта молчи“, рече лидерот на ВМРО-ДПМНЕ.
Во врска со владеењето на правото, оваа Влада, рече, ја елиминира правдата со неправда. Според Мицкоски, „во земјава нема вистинска одговорност и последните 30 години не одговарал ниту еден бандит кој се збогатил на грбот на народот“.
Затоа, рече Мицкоски мора да се договори датум за редовни избори. Тој му предложи на премиерот Димитар Ковачевски да „земе бел лист хартија и нека напише кој било датум помеѓу двата најголеми верски празници идната пролет и да одржиме парламентарни и претседателски избори на еден трошок“.
Тој порача дека „обновата ќе дојде, а промените ќе бидат онолку силни, колку што ќе биде силна поддршката“.
Како што оцени Мицкоски, „оваа Влада, преку одбегнување да се договори датум за избори, оди кон свесно предизвикување уставна и политичка криза“.
„Срамота е што преку медиуми се договараме и лиферуваме датуми за редовни избори. Разбирам кога велат дека Ковачевски никој не го слуша во Владата. Затоа е оддаден на шетање по светот и компаниите. Но, мора да се договори датум за редовни избори. Ќе доживеат жесток пораз и тежок дебакл од народот. Народот треба масовно, во огромен број да им ја прати пораката на овие избори – нема играње со народот. Народот е посилен од секоја тесна клика и елита која си игра со судбината и ја одзема иднината. Доаѓаат промени. Заветот на Организацијата и поинаквите цели кои мора да ги оствариме се да ја кренеме Македонија на здрави нозе“, истакна Мицкоски.
Тој рече и дека не сака да биде предмет на уцени при создавањето на идната влада.
„Затоа, го замолувам секој граѓанин да се вклучи и да излезе на следните избори масовно. Важно е гласот на секој човек да има важност. Лошите политичари се на власт, зашто тие ја користат неодлучноста на оние кои не гласаат. Воедно, народот треба да биде свесен за данајските игри на оние во опозицијата стимулирани од власта да глумат патриоти и да го ситнат отпорот против оваа власт. Нив ќе ги препознаете што имаат по некоја критика за власта, колку за да помислите дека се опозиционери, ама за сѐ друго и по професија и норма се критичари на опозицијата. Со часови навредуваат, плукаат, анализираат луѓе од опозицијата. Неприродно се занимаваат со ВМРО-ДПМНЕ кога ја имаме најнеспособната власт. Тие треба кај народот да внесат сомнеж за опозицијата и со секој нејзин потег да ве одвратат од гласање. Мојата порака е не им верувајте, внимавајте. Одговорот на ова треба да биде да не пропадне вашиот глас за тие опозиционери и опозиција на опозицијата, туку масовно да се поддржи единствената сила способна и подготвена за промени ВМРО-ДПМНЕ и коалицијата што ќе ја предводи ВМРО-ДПМНЕ“, порача Мицкоски.
Пред Мицкоски зборуваше Алексндар Пандов, претседател на Патриотскиот институт, кој рече дека ВМРО-ДПМНЕ ќе остане да биде заштитник на Македонија и на македонските национални интереси.
„Делото на револуционерите е големо и затоа нивните имиња се со златни букви запишани во македонската колективна меморија. Македонскиот идеал е како пиреј, колку повеќе го корнеш, толку повеќе излегува на површината. Нескршливиот дух опстои низ војните, како што опстои и идејата за македонска држава и покрај сите премрежја. ВМРО продолжи да живее кај секој Македонец како симбол на слобода и независност. Организацијата е завет за секој Македонец, ВМРО и денес е стожерот на македонската борба за правда и интереси, ги обединува сите граѓани и застанува напред во борбата за достинство и иднина“, истакна Пандов.
Тој јавно му се заблагодари на Мицкоски за поддршката на Патриотскиот институт.
-Сите сме заедно во битката да ја кренеме повторно Макеоднија на нозе. Тоа е нашата најважна битка. Ќе останеме заштитници на Македонија и на македонските национални интереси. Тоа е наша обврска како генерација. ВМРО го обединувало народот во минатото, го обединува и денес“, подвлече Пандов.
На настанот присуствуваа членови на Извршниот комитет на партијата, на Унијата на жени на ВМРО-ДПМНЕ, Унијата на млади сили и Унијата на ветерани, како и претставници на коалициските партнери.
