Македонска алијанса за европска интеграција, МАЕИ, упатува срдечни честитки по повод државниот празник 23 Октомври – Денот на македонската револуционерна борба. Овој значаен ден зазема посебно место во нашата историја, потсетувајќи нè на непоколебливиот дух и решителност на македонскиот народ, пишува во честитката.
Од МАЕИ потсетуваат дека на денешен ден во 1893 година, формирањето на Внатрешната македонска револуционерна организација – ВМРО, го означила „почетокот на длабокото револуционерно движење насочено кон ослободување на Македонија“.
Тоа беше раѓање на првиот организиран политички субјект, кој го постави камен-темелникот на македонскиот отпор и ги негува стремежите за слобода и зачувување на нашиот македонски идентитет, велат од МАЕИ.
Датумот 23 Октомври е доказ за темелите на македонската државност, а тој е ден кој го славиме со гордост, пишува понатаму во честитката и се посочува дека додека го одбележуваме овој историски настан, сите треба да се потсетиме дека наша колективна должност е, каде и да сме, да го чуваме нашето богато наследство и посебен македонски идентитет.
„Нека е вечен споменот на македонските револуционери, а нивното наследство да продолжи да нѐ инспирира додека напредуваме во единство и решителност кон посветла иднина. Честит Денот на Македонската револуционерна борба на сите граѓани на Македонија и на Македонците ширум светот“, пишува на крајот од честитката на МАЕИ, потпишана од претседателот Васил Стерјовски.
