„Иранската нуклеарна програма претставува сериозна закана за меѓународната безбедност. На Иран никогаш не смее да му се дозволи да развие нуклеарно оружје, а САД презедоа чекори за ублажување на таа закана“, рече Стармер во соопштението.
„Го повикуваме Иран да се врати на преговарачката маса и да постигне дипломатско решение за да ѝ се стави крај на оваа криза“, рече тој.
Министерот за трговија на Велика Британија изјави за Скај њуз дека Лондон не бил вклучен во американските напади врз Иран и не добил барање за користење на британската база во Диего Гарсија, но бил информиран за нападите.
Функционер на НАТО изјави за Ројтерс дека алијансата внимателно ја следи ситуацијата. На прашањето за одговорот на алијансата на нападите и какво било потенцијално влијание врз неборбената мисија на НАТО, која спроведува активности за обука и градење капацитети во соседен Ирак, функционерот рече: „Секако дека внимателно ја следиме ситуацијата“.
Високата претставничка на ЕУ за надворешни работи и безбедносна политика, Каја Калас, ги повика сите страни да се вратат на преговарачката маса, но нагласи дека на Техеран не смее да му се дозволи да развива нуклеарно оружје.
„Ги повикувам сите страни да се повлечат, да се вратат на преговарачката маса и да спречат понатамошна ескалација“, рече таа, додавајќи дека министрите за надворешни работи на ЕУ ќе разговараат за ситуацијата денес.
„На Иран не смее да му се дозволи да развива нуклеарно оружје“, рече Калас во објава на социјалната платформа Икс.
Ирак, Саудиска Арабија и Катар исто така реагираа
Ирак остро ги осуди нападите на САД врз нуклеарните постројки во соседен Иран и предупреди за последиците врз безбедноста на Блискиот Исток.
„Оваа воена ескалација претставува сериозна закана за мирот и безбедноста на Блискиот Исток и сериозен ризик за регионалната стабилност“, соопшти ирачката влада.
Багдад повика на итна деескалација и употреба на дипломатија за смирување на кризата.
„Ова мора да се направи на начин што ќе ја заштити колективната безбедност и ќе ги почитува принципите на меѓународното право и Повелбата на Обединетите нации“, додаде портпаролот на ирачката влада во онлајн-изјава.
Ирак, кој одржува добри односи и со Вашингтон и со Техеран, се обидува да се држи подалеку од тековната војна меѓу Иран и неговиот главен соперник Израел.
Саудиска Арабија изрази „сериозна загриженост“ по американските напади врз нуклеарните постројки на Иран, се вели во соопштението на Министерството за надворешни работи на Икс.
Кралството ја повика меѓународната заедница да ги засили напорите во такви „многу чувствителни околности“ за да се постигне политичко решение за ставање крај на кризата.
Катар изјави дека опасните тензии по американските напади врз нуклеарните постројки на Иран ќе доведат до „катастрофални последици“ на регионално и меѓународно ниво, се вели во соопштението на Министерството за надворешни работи на Икс.
Министерството го осуди „влошувањето“ на ситуацијата по американските напади, се вели во соопштението.
