Веста за ДПА ја потврдија неколку новинари и продуценти од Кабул. Талибанците ги информираа сите телевизиски станици дека новата наредба е конечна и дека „не е за расправа“, објавија медиумите. На социјалните мрежи се шират фотографии од водителки со покриени лица.
Еден од тамошните ТВ продуценти рече дека според новата наредба, лицата на водителките мора да бидат покриени „така што ќе им се гледаат само очите“. Талибанците сè уште не издале јавно соопштение во врска со наредбата, која следеше набргу откако го воведоа правилото дека жените мора да го покриваат лицето на јавно место.
Откако се вратија на власт, талибанците систематски ги кршат човековите права во земјата и наметнаа сериозни ограничувања за медиумите. Имаше повеќе случаи на тепање и притворање на новинари поради извршување на нивната работа, а на девојките и жените им се одземени бројни права, вклучително и правото на образование, работа и движење.
