Во таа смисла покрај тоа што Владата со заеми и финансиски средства директно ги финансира општините да помогне во имплементацијата на капиталните проекти, особено во делот на управување со отпад, собирање и третман на отпадни води, а секако и во делот на водоснабдување, ја поддржува и институционалната компонента, односно јакнењето на општините за да можат во иднина самите да ги спроведуваат сите обврски што ги имаат за да дадат услуги на граѓаните по европски стандарди.
На новинарско прашање колку се функционални комуналните претпријатија во државата во врска со овие задачи, министерката Шукова изрази жалење дека комуналните претпријатија не може да се стават во категоријата на ефикасни комунални претпријатија, пред се поради енергетската криза.
„Треба да се зајакнуваат капацитетите, треба да се работи и на човечките ресурси и на финансиските портфолија“, истакна Шукова, која информираше дека во моментов има два активни заеми кои треба да помогнат, едното за јавните претпријатија во делот на водовод и канализација како државен заем што нема да ги оптовари општините, а второто е од Европската банка за обнова и развој којшто ќе помогне во делот на управување со отпад.
На прашањето што најмногу недостасува во ефикасноста на општините, таа одговори дека недостасува основната инфраструктура за управување со отпад.
„Ние во моментов немаме стандардна инфраструктура, немаме санитарни депонии, ние имаме само собирање и одлагање на отпадот, немаме сериозна селекција, не ги практикуваме начините за намалување на количините на отпад коишто финално се депонираат“, истакна министерката за животна средина и просторно планирање.
Таа исто така информираше дека во моментов тече јавната набавка за контејнери за сите општини во државата за предселекција на отпадот којшто исто така ќе биде преку Владата, односно преку Министерството за животна средина и просторно планирање.
Претседателот на АДКОМ, Пеце Милевски, изјави дека целта на конференцијата е јавните претпријатија, компаниите и учесниците да се запознаат со услугите коишто ги нудат експертите за истата тема и да се запознаат со нови технологии, нови начини на работа и нови принципи.
„За да ги олесниме услугите коишто ние ги даваме кон граѓаните и корисниците секогаш треба да се трудиме да ги унапредуваме со нови технологии и нови начини и принципи на работа“, рече тој.
