„Покрај буџетот, има и условен буџет. Со него клиниката може да набавува лекови кои не се на позитивната листа под услов да добие согласност од Министерството за здравство, после што дописот доаѓа до ФЗОМ. Фондот гледа дали има буџет за тие лекови и дали има потреба од нив. Потоа фондот на управен одбор носи одлука за согласност,“ рече Рамадани.
Рамадани одговори на прашањето на пратеникот на ВМРО-ДПМНЕ Антонио Милошоски кои се обврските на Фондот за здравствено осигурување (ФЗОМ) поврзани со членот 9 од Законот за здравствено осигурување којшто пропишува дека клиниката има обврска да побара од ФЗОМ согласност за набавка на биолошка терапија.
Милошоски нагласи дека ова само потврдува дека екс-директорот на Клиниката за онкологија, доктор Нино Васев бил над законот, над согласностите и над ограничувањата што Фондот му ги давал за лекови.
„Директорот не бил сам, имал и политички покровител штом вака лесно и долги години ги пречекорувал набавките за лекови во големи суми, што резултираше во морбиден скандал и профит“, рече Милошоски.
Пратеникот на СДСМ, Ненад Коциќ праша дали додека Рамадани бил директор на ФЗОМ, добил пријава за незаконско работење и злоупотреба на лекови на Клиниката за онкологија и дали Фондот вршел редовна контрола во Клиниката за онкологија.
„Во 2017 направена е контрола на условниот буџет во два наврати. Констатирано е дека не е доставена документација за аплицирана терапија бидејќи истата не била набавена. Во 2019 сме имале претставка за рефундација за лек кој не бил на позитивната листа. Во 2019 во редовна контрола констатирана е една погрешно кодирана процедура, одговори Рамадани.
Седницата на Анктетната комисија за Онкологија продолжува со прашања на пратеници до поранешниот директор на ФЗОМ, Миле Сугарев, кој оваа функција ја извршувал само шест месеци.
