Гутереш во пораката до делегатите на петтата ревизија на Меѓународниот договор за забрана на нагазни мини, познат и како Конвенција од Отава, наведе дека 25 години откако стапил во сила, некои страни повторно почнаа да ги користат, додека други не напредуваат со нивното уништување.
„Ги повикувам земјите-членки да ги исполнат своите обврски и да обезбедат почитување на конвенцијата. Ги охрабрувам сите држави што сè уште не ѝ се приклучиле на конвенцијата, 164 на број, да ѝ се приклучат. Светот без нагазни мини не само што е можен – тој е на дофат на раката“, рече Гутереш на отворањето на конференцијата во Камбоџа.
Папата Франциско рече дека нагазните мини „продолжуваат да предизвикуваат ужасни страдања на цивилите, особено на децата“.
„Папата Франциско ги повикува сите држави што сѐ уште не го сториле тоа да пристапат кон конвенцијата, а во меѓувреме веднаш да го прекинат производството и употребата на нагазни мини“, рече заменикот на папата, Пјетро Паролин, кој ја прочита изјавата од името на папата.
Конвенцијата од Отава беше потпишана во 1997 година и стапи во сила во 1999 година. Сепак, дури и по речиси три децении, многу земји, вклучувајќи ги САД, Кина, Индија, Пакистан, Јужна Кореја и Русија, ја немаат потпишано.
Во извештајот објавен минатата недела од меѓународната мониторинг организација „Лендмајн монитор“ се наведува дека нагазните мини сè уште активно ги користеле Русија, Мјанмар, Иран и Северна Кореја во текот на 2023 и 2024 година.
Се додава дека герилските вооружени групи ги користеле во Колумбија, Индија, Мјанмар, Пакистан и во Појасот Газа.
Најмалку 5.757 луѓе биле убиени и ранети од нагазни мини и неексплодирани убојни средства минатата година, пред сѐ цивили, од кои една третина биле деца, според извештајот.
Лендмајн монитор наведува дека Русија „интензивно“ користи такви мини во Украина, а пред само една недела САД објавија дека ќе почнат да го снабдуваат Киев со нагазни мини за да го запрат напредокот на руската армија на фронтот.
Камбоџа беше една од најтешко погодените земји во светот по три децении војна и немири, кои завршија во 1998 година, со околу четири до шест милиони нагазни мини или неексплодирани убојни средства во земјата.
Гутереш ја пофали Камбоџа за нејзините огромни напори за деминирање и за споделување на своето искуство со другите и за придонесот во мировните мисии на ОН.
„Нагазните мини претставуваат јасна и присутна опасност за цивилите. „Дури и откако ќе престанат борбите, ова застрашувачко и неселективно оружје може да остане, предизвикувајќи генерации луѓе да живеат во страв“, рече тој.
