„По која основа се отфрлени нашите амандмани, кои не се ниту заведени, немаат архивски број. Мора да ја прекинете седница“; бурно реагираше Крмов, а Мисовски велеше дека попусто му тече времето.
„Прекинете ја седницата. Ова е нечуено“, велеше Крмов и почна да ги фрла кон Мисовски амандманите, а потоа и самиот монитор кој стоеше на масата на претседателот на Собранието, заврши бучно на подот, како и телефонот.
Потоа беше дадена пауза.
„Со фрлање на амандмани нашите двајца пратеници ја прекинаа седницата со пола час пауза! Широката коалиција СДС-ДУИ-ДПМНЕ насилнички и неделовнички ги одби амандманите на Левица. Единствената опозиција во Собранието ДЕНЕС физички ќе ја брани македонската демократија од трите квинслишки партии!“, објави Левица преку социјалните мрежи.
Претходно, пред инцидентот, Димитар Апасиев побара да се тргне првата точка од дневен ред односно предлог деловникот. Против овој предлог гласаа 82 пратеници и истиот не беше усвоен.
Апасиев објасни дека Левица поднесе над 2.000 амандмани за да спречи носење на штетен и недемократски Деловник, со кој се укинува филибастеринг.
Тој предложи првата точка да се тргне од дневен ред и во порелаксирана атмосфера да се донесе утре или задутре, кога ќе се пронајде политички консензус. Според Апасиев, ова што денес ќе го направи претседателот на Собранието е без преседан во парламентарната историја.
„Денес се спрема шверц на Собранието во Република Македонија. ДПМНЕ и ДУИ ќе ги шверцаат сите закони со европско знаменце во следниот парламентарен состав. Ова што денес ќе го направи претседателот на Собранието е без преседан во парламентарната историја.Тоа значи дека опозицијата без оглед дали има 59, 58 пратеници, не ќе може ништо да спречи, тоа е влез во диктатура“, рече Апасиев.
Лидерот на Левица нагласи дека амандман на пратеник не може да се отфрли и затоа, како што рече, ќе употреби чевел,
Удирајќи со чевелот по секој амандман, тој ги „заверуваше“ и му ги предаваше на претседавачот.
