За тоа колкава материјална штета е направена дополнително ќе биде соопштено, вели Џафери и нагласува дека ќе треба да ја плати пратеникот Борислав Крмов од Левица, кој го искрши мониторот и друг инвентар на претседавачката маса во пленарната сала.
„Ако некој од вработените направи штета на работа, тој го плаќа трошокот“, посочува Џафери и додава дека така ќе биде и во овој случај.
Поради неможноста пленарните седници да се одржуваат во Салата за седници од денеска до санирање на штетата тие ќе се одржуваат во големата сала позната како Купола, вклучувајќи го и обраќањето на генералниот секретар на НАТО Јенс Столтенберг.
„Имајќи прeдвид дека во текот на денешната работа е направена материјална штета и е онеспособен системот за работа седниците на Собранието натаму до отстранување на штетата до поправка на оштетениот дел ќе се одвива во салата Купола. И свечената седница ќе се одвива таму“, најави претседателот на Собранието Талат Џафери по завршување на продолжението на 131. седница. Пленумот ќе продолжи со работа по оваа седница денеска во 11 часот.
Пратениците на Левица вчера предизвикаа инцидент за време на амандманската расправа за новиот Деловник за работа на Собранието. Борислав Крмов искрши дел од инвентарот вклучувајќи и монитор од претседавачката маса и се расфрлаше со листови од амандманите, а потоа нему му се придружи и Димитар Апасиев.
