Низ светот и во различни култури, пеењето на бебињата е инстинктивен чин. Сега, новите откритија покажуваат дека пеењето е лесен, безбеден и бесплатен начин за подобрување на менталната благосостојба на новороденчето.
Бидејќи подобреното расположение во раното детство е поврзано со подобар квалитет на живот и за родителите и за бебињата, тоа е од корист за целото семејство, според соопштението од Медицинскиот факултет на Универзитетот Јеил.
„Пеењето е нешто што секој може да го прави, а повеќето семејства веќе го прават тоа. Покажуваме дека оваа едноставна практика може да доведе до вистински здравствени придобивки за бебињата“, изјави Еун Чо, доцент на Јеил.
„Не мора секогаш да се фокусираме на скапи, комплицирани интервенции кога има други кои се подеднакво ефективни и лесни за усвојување“ – додаде Лидија Јурдум, доктор по психологија на Универзитетот во Амстердам и коавтор на студијата објавена во Детски развој.
Новото истражување опфатило 110 родители и нивните бебиња, од кои повеќето биле помлади од четири месеци. Истражувачите случајно ги поделиле родителите во две групи, охрабрувајќи ја едната група почесто да им пее на своите бебиња така што ги учеле нови песни, обезбедувале караоке видеа со упатства и песнички прилагодени за бебиња и испраќале неделни билтени со идеи за вклучување на музиката во секојдневните рутини.
Во текот на четири недели, овие родители добивале анкети на своите паметни телефони во случајни интервали во текот на денот. Родителите одговарале на прашања за расположението на нивното бебе, неговата нервоза, времето поминато во смирување, расположението на старателот и фреквенцијата на музичко однесување. На пример, од родителите било побарано да оценат колку позитивно или негативно било расположението на нивното бебе во последните два до три часа пред да ја добијат анкетата. Контролна група од 56 родители, исто така, добила идентична интервенција четири недели по почетниот експеримент.
Истражувачите откриле дека родителите можеле успешно да го зголемат времето кое го поминуваат во пеење на своите бебиња.
„Кога ќе ги замолите родителите да пеат повеќе и ќе им дадете многу основни алатки за да им помогнат на патот, тоа им е многу природно“, рече Јурдум.
Родителите не само што почесто пееја, туку избраа да ја користат музиката особено во еден контекст: да ги смират своите бебиња кога тие биле нервозни.
„Не им кажавме на родителите: Мислиме дека треба да му пеете на вашето бебе кога е вознемирено“, но тоа е она што тие го направија“, изјави Самуел Меир, вонреден професор во Центарот за студии за деца и директор на Музичката лабораторија и еден од авторите на студијата.
Одговорите на анкетите покажаа дека зголеменото пеење довело до мерливо подобрување на целокупното расположение на бебињата, во споредба со оние во контролната група – со други зборови, родителите кои пееле повеќе го оцениле расположението на своите бебиња како значително подобро. Важно е да се напомене дека подобреното расположение било определено генерално, а не само како директна реакција на музиката.
Иако пеењето не влијаело значително на расположението на лицата што се грижат за нив во оваа студија, Мер верува дека може да има последователни ефекти врз здравјето кај младите семејства.
„Секој родител знае дека расположението на бебето влијае на сите околу него“, додаде тој.
