Генералниот инспектор ќе ги „оцени безбедносните процедури на Тајната служба на Соединетите Држави за настанот на кампањата на поранешниот претседател Трамп на 13 јули 2024 година“, се вели во известувањето на веб-страницата на генералниот инспектор под „тековни проекти“ под категоријата „Контра-тероризам и закани за татковината“.
Безбедноста на митингот на републиканскиот претседателски кандидат во Пенсилванија е под лупа откако Трамп беше застрелан во десното уво додека им се обраќаше на насобраните од говорница. ФБИ соопшти дека го истражуваат пукањето како атентат.
Овој настан покрена сериозна загриженост за тоа како осомничениот можел да добие пристап до блискиот покрив со директна видливост до местото каде што Трамп зборувал. Американската тајна служба го назначи тој покрив како надвор од нејзината безбедносна зона, фатален превид што агенцијата не требаше да го направи, според двајца поранешни функционери на Тајната служба.
Вооружениот напаѓач пукал кон Трамп од зграда оддалечена 140 метри, а обезбедувањето на собирот тврди дека тоа било надвор од безбедносниот периметар, но поранешниот специјален агент на тајната служба Кенет Валентин тврди дека тоа „едноставно не е точно“.
„Таа зграда требаше да биде во заштитената зона. Тоа е огромен превид“, рече тој, нагласувајќи дека „агенцијата морала да ја идентификува таа зграда како безбедносен ризик“. Во престрелката е убиен еден учесник на митингот, двајца се ранети, осомничениот е мртов.
Демократскиот американски претседател Џо Бајден, кој ќе се соочи со републиканецот Трамп на изборите во ноември, во неделата изјави дека наредил независна ревизија, а републиканските пратеници во Конгресот ветија брзи истраги.
