Лавров за рускиот портал Аргументи и факти посочи дека тврдењата за нерамноправните односи меѓу Москва и Пекинг веќе долго време „непријателските земји генерално ги преувеличуваат“.
„Ова го гледаме како обид да се фрли сенка врз нашите успеси, да се забие клин во пријателството меѓу Москва и Пекинг“, додаде тој.
Шефот на руската дипломатија рече дека разговорите меѓу рускиот претседател Владимир Путин и кинескиот претседател Си Џинпинг иницирале „стратегиско партнерство“ меѓу Москва и Пекинг надвор од „исклучиво билатералниот контекст“.
„Секако дека имаме чувство на заедништво и подготвеност да застанеме рамо до рамо во одбрана на основните интереси на секој од нас“, рече Лавров.
Кина и Русија во почетокот на 2022 година потпишаа договор за „неограничено“ партнерство, само неколку недели пред почетокот на руската инвазија на Украина.
Лавров, исто така, рече дека непријателскиот однос на ЕУ кон Москва значи дека таа ја „загубила“ Русија, додека Москва има намера да постапува строго со ЕУ доколку биде потребно.
„Европската Унија ја загуби Русија. Но таа самата е виновна. Земјите-членки на ЕУ и лидерите на ЕУ се тие што отворено изјавуваат дека е неопходно да ѝ се нанесе, како што го нарекуваат, стратегиски пораз на Русија“, изјави Лавров.
Тој ги опиша чекорите на ЕУ за снабдување на Украина со оружје и инструктори како „непријателски“.
„Како одговор на непријателските чекори, доколку е потребно, ќе постапиме строго врз основа на националните интереси на Русија и принципот на реципроцитет прифатен во дипломатската практика“, посочи Лавров.
