„Украинците не треба да чекаат ракетите да ја преминат границата, тие треба да можат директно да ги уништат местата на лансирање“, рече Бербок, повикувајќи се на принципот на самоодбрана.
Бербок, од редовите на германските Зелени, рече дека нејзината партија во ова прашање се согласува со источноевропските партнери, како и со британската, француската и американската влада.
Социјалдемократската партија на германскиот канцелар Олаф Шолц не сака да му обезбеди на Киев оружје што ќе им овозможи на украинските сили да напаѓаат цели длабоко на руска територија.
Министерката ги истакна уникатните предизвици со кои се соочува Украина, чии системи за противвоздушна одбрана стануваат неефикасни поради близината на руската граница и брзото дејствување на ракетите.
Според медиумите, претседателот Бајден ја овластил Украина да користи ракети АТАКМС за да ги брани сопствените сили, особено во руската област Курск, која беше делумно окупирана од украински војници. Иако Пентагон и Советот за национална безбедност на САД одбија да ги коментираат извештаите, тие не ги ни демантираа.
