Новиот мини-моноволумен фиат 500 мпв, со работен наслов елзеро (L-Zero), ќе дебитира на Женевскиот саем за автомобили. Поголемата верзија на новото „фиќо“ треба да го замени актуелниот модел мултипла и да му биде директен конкурент на мини кантримен.
Новиот градски моноволумен ќе има модификувана платформа од новата панда и ќе се продава во верзии со пет или седум седишта. Предниот погон ќе биде стандарден, но ќе има и верзија со погон на сите тркала. Италијанскиот концерн сè уште нема конечно име за новиот модел, а покрај елзеро во игра се и 500+ и мултипла.
Во понудата на мотори ќе ги има турбобензинецот од 900 кубни сантиметри, 1,3 литарскиот мултиџет дизел, и поголемиот 1,4 турбобензинец. Купувачите ќе може да избираат меѓу мануелен 5-брзински и автоматски менувач со 7 брзини.
Производството на градското комбенце на Фиат ќе почне во Крагуевац, Србија, во втората половина на оваа година. Цените кај нас се очекува да почнуваат од 10.000 евра.
