Оваа средба, која е во ист формат како и на самиот почеток на неговиот прв мандат како претседател на Собранието, на 12 мај 2017 година, е во насока на продолжување со транспарентноста и отчетноста и на неа Џафери ги презентирал плановите за идното функционирање на законодавниот дом. Џафери, како што се наведува во соопштението, накратко се осврнал на постигнатите цели, оставајќи простор низ спонтана дискусија, амбасадорите да споделат свои видувања за работата на Собранието под негово водство. Тие воедно се интересирале за следните активности во пресрет на изборот на техничката Влада, за што Џафери ги информирал за уставните рокови и деловничката процедура, како за изборот на нов претседател на Собранието, така и за изборот на техничката Влада, за распишувањето на претседателските и парламентарните избори и последователно, сите останати дејствија.
„Средбата претставуваше убава можност низ заеднички разговор да се споделат видувањата за работата на Собранието во изминатите два собраниски мандати. На средбата беа присутни и генералната секретарка на Собранието, Цветанка Иванова и претставници од Кабинетот на претседателот и Службата на Собранието“, пишува во соопштението од Секторот за односи со јавноста на законодавниот дом.
