„Ова е значајна посета бидејќи ова е првиот политичар од тој ранг што го посети Киев по одлуката на ЕУ да го започне пристапниот процес на Украина и Молдавија“, рече портпаролот на министерството Павел Вронски, пренесе новинската агенција ПАП. Сите 27 членки на Европската Унија, со исклучок на Унгарија, се договорија минатата недела за почеток на пристапните преговори со Украина.
Министерот Сикорски ќе се сретне и со украинскиот претседател Володимир Зеленски, изјави портпаролот. „Министерот подготвува и презентира пакет помош за Украина, како и неговата програма за соработка и политичка поддршка“, рече тој.
„Полска не само што може да биде воен туку треба да биде и економски и политички столб на Украина. Министерот ќе изрази поддршка за украинските аспирации и помош во подготовките за членството во ЕУ“.
Една од пречките во полско-украинските односи во последните недели беше забраната за увоз на украинско жито во Полска и неколку гранични премини блокирани од возачите на камиони. Министрите за земјоделство на двете земји одржаа онлајн разговори, објави во петокот украинското министерство на Телеграм.
Украинскиот министер за земјоделство, Микола Солски, предложи состанок во Киев или на полско-украинската граница за да се разговара за „многу нови предизвици“ за двете страни во наредната година. Полските возачи на камиони ја блокираат границата повеќе од еден месец. Неговиот полски колега Адам Сикерски ја потврди својата подготвеност да разговара, соопшти Министерството.
