„Врховната рада на Украина прими изјави за оставките на Камишин, Маљусик, Стрелц и Коваљ“, соопшти претседателот на Врховната рада, Руслан Стефанчук, пренесува Укринформ.
Тој посочи дека нивните оставки ќе се разгледуваат на некоја од следните пленарни седници.
Причините за оставките не беа наведени, само Камишин најави дека ќе остане во одбранбениот сектор, но на друга функција.
Камишин беше назначен во март 2023 година и ги предводеше напорите на Украина да го зајакне одбранбеното производство на оружје, од нападни беспилотни летала до ракети со долг дострел, додека силите на Киев се борат со многу подобро вооружената и побројна руска армија.
Во годината од почетокот на сеопфатната инвазија на Кремљ во февруари 2022 година, тој се профилираше како ефективен воен лидер кој управува со железниците на нацијата, витална логистичка артерија и за цивилите и за војската.
Заминувањето на тројцата министри ја зголемува неизвесноста околу владата, бидејќи уште најмалку пет министерски ресори се празни откако беа сменети на почетокот на годинава.
Претседателот Володимир Зеленски и неговиот политички тим сега би можеле да ги пополнат сите позиции во обид да воведат ред во владата пред да отпатува за Соединетите држави овој месец за да присуствува на Генералното собрание на Обединетите нации.
Украинскиот лидер минатата недела изјави дека се надева дека ќе се сретне со американскиот претседател Џо Бајден и неговите двајца можни наследници за да претстави „план за победа“ што ќе ја принуди Русија да ја прекине војната во Украина.
