Бегалските палестински семејства се засолниле во училиштето во Газа. Цивилната заштита на Газа, чии податоци за жртвите се сигурни според Ројтерс, објави дека во нападот загинале речиси 100 луѓе.
Израел објави дека во тој комплекс дејствувале околу 20 милитанти.
„Длабоко сме загрижени поради извештаите за цивилни жртви во Газа по нападот на израелските одбранбени сили врз комплекс во кој имало училиште“, соопшти Белата куќа, додавајќи дека Вашингтон е во контакт со Израел за да добие информации за тоа што се случило.
Вашингтон е под зголемени домашни и меѓународни критики, вклучително и од групите за човекови права, поради поддршката на Израел. Нападот во саботата се случи еден ден откако портпаролот на Стејт департментот рече дека САД ќе му дадат на Израел 3,5 милијарди долари за купување на американско оружје и воена опрема, што Конгресот го одобри во април.
„Знаеме дека Хамас ги користи училиштата како локации за собирање и дејствување, но исто така постојано и упорно кажуваме дека Израел мора да преземе мерки за да ја минимизира штетата на цивилите“, соопшти Белата куќа.
Белата куќа, исто така, предупреди дека „премногу цивили и понатаму се убиени и повредени“ во војната во Појасот Газа и повторно повика на прекин на огнот.
Нападот на училиштето во Газа го осудија Египет, Катар, Обединетите Арапски Емирати, Саудиска Арабија и Турција. Шефот на европската дипломатија, Жосеп Борел, изјави дека е ужаснат од сликите од училиштето и британскиот министер за надворешни работи Дејвид Лами го осуди нападот.
Десетици илјади палестински бегалци најдоа засолниште во училиштата во Појасот Газа, од кои повеќето се затворени од почетокот на војната пред 10 месеци.
