„Во пронајдените предмети кај Т.П. од Битола се кутија со бела грутчеста материја, бела прашкаста материја, повеќе ќеси со остатоци од бела прашкаста материја, две дигитални ваги со остатоци од кокаин, таблети, нож со остатоци од кокаин, скенер-детектор, лаптоп компјутер, два мобилни телефона, пет екслузивни рачни часовници, повеќе парчиња златен накит, над осум илјади евра во различни апоени, 600 австралиски и 800 американски долари, 30 илјади денари, патничко возило “БМВ”, со битолски регистарски ознаки“, соопштија од МВР.
Претходно, во текот на изминатото деноноќие претреси со судски наредби биле извршени и во Струмица, при што во домот на Д.П. од село Ангелци, струмичко, бил пронајден предмет кој потекнува од извршено кривично дело разбојништво, додека во Тетово во домот на Б.Х. била пронајдена и одземена марихуана. И двајцата се приведени, а од МВР велат дека и против овие двајца приведени и осомничени ќе поднесе кривични пријави.
