„Сакам да започнам со една локална тема, во четвртата изборна единица малку се општините каде што ВМРО-ДПМНЕ нема градоначалник, една од тие е Дојран. Убеден сум дека следната година ќе имаме градоначалник и тука и дека ВМРО-ДПМНЕ ќе ја води општината“, нагласи тој.
Николоски додаде дека има неколку пораки до актуелниот градоначалник при што посочи дека во Дојран пропаѓаат убаво уредените плажи и патеката околу езерото. Во Дојран езерото зависи само од Господ и од природата, затоа што не функционира или нередовно функционира системот што треба да го одржува езерото. Не е одговорно од градоначалникот што воопшто не посветува внимание на овие работи, рече Николоски.
„Пред некој ден бевме на другата страна, во селото Николиќ и ни рекоа дека тука во близина имаа преубаво уредена плажа, која за жал сега ја нема затоа што никој не се грижи за неа. И ни велат дека покрај земјоделие можат убаво да живеат и од туризам, но градоначалникот тоа не го овозможува“, рече Николоски.
„Би му порачал дека треба многу, многу поодговорно да се грижи за општествениот, државниот имот затоа што тоа е имот на сите нас и тука се трошат пари од сите вас, од граѓаните на Дојран, но и на сите кои што сакаат да помогнат“, порача Николоски.
Тој посочи дека втората порака до градоначалникот на Дојран е да го предупреди дека согласно Изборниот законик и Кривичниот законик се сметаат за тешки кривични дела, делата против изборите. Николоски додаде дека слуша дека градоначалникот прави притисоци и нудел поткуп.
„Да му кажам дека тие кривични дела не застаруваат, за нив се одговара, казните се големи. За некои се од пет години нагоре, а за некои се и од 10 години нагоре. Така што пет пати да отвори очи пред што било да прави, да престане да прави притисоци и да престане да нуди поткуп“, нагласи Николоски.
„Третата работа која што сакам да ја порачам е дека многу внимателно ја следиме неговата работа. Иако општината на прв поглед изгледа мала заради езерото е исклучително атрактивна. Има бројни сомнежи за злоупотреба на службена положба. А, пред се во делот на урбанизмот, и тоа го следиме многу внимателно. И сето тоа ќе биде внимателно истражено затоа што никој не смее да се богати на ваш грб, никој не смее да се богати на грб на граѓаните“, порача тој.
Николоски укажа дека се надева дека градоначалникот на Дојран ќе ги слушне трите пораки.
Тој додаде дека изборот на овие избори е јасен, Македонија е време да стане повторно горда, а тоа ќе биде со Гордана Сиљановска Давкова како претседател на државата и ВМРО-ДПМНЕ да ја формира владата.
