„ Согласно членот 9 од Законот за Академија за судии и јавни обвинители, во Управниот одбор на Академијата, дваца членови се назначуваат од страна на Судскиот совет од редот на судиите, како и двајца членови кои се назначуваат од редот на јавните обвинители од страна на Советот на јавните обвинители.
Меѓутоа, наместо судии и јавни обивнители, деновиве Судскиот совет и Советот на јавните обвинители за членови на Управниот одбор на Академијата скандалозно назначија луѓе од сопствените редови. Ова претставува сериозно законско прекршување и ЗЛОУПОТРЕБА на службената положба од страна на членовите на Судскиот совет и Советот на јавните обвинители, со оглед дека на истите во моментот на извршувањето на нивните функции во Советите им мируваат судиските и обвинителските функции, поради што немаат право да бидат членови и на Управниот одбор на Академијата“, се наведува во соопштението на партијата Левица.
Дополнително, во реакцијата се укажува дека назначувањата се извршени и на крајно нетранспарентен начин, без образложение за ваквото незаконско постапување.
“Без каков било процес за изразување на интерес на судии и јавни обвинители, јавно презентирање на програми на кандидати итн., назначувањето на членови на Управниот одбор на Академијата било извршено на седница на Советот на јавните обвинители која траела само 11 минути, додека пак Судскиот совет назначувањето го извршило на таинствен начин под точката ‘разно’ “, велат од Левица.
Последните именувања во УО на Академијата за судии и јавни обвинители, од Левица ги оценуваат како дел од синдромот „партиите на власт повеќе од три децении да го узурпираат правосудството преку раководни лица во правосудството кои се верни на партиско-бизнис интересите на елитистичките партии кои криминално владејат со Македонија 33 години“. Наведуваат дека оваа контрола над правосудните органи , партиите особено ја остваруваат преку Судскиот совет и Советот на јавни обвинители, во чиј состав, за жал ,претежно се поставуваат луѓе блиски до власта и партиските и бизнис- интереси.
Левица ја повикува Државната комисија за спречување на судир на интереси и корупција да реагира на ваквото скандалозно постапување на овие органи, кои се најголеми виновници за очајната состојба во правосудството и ниската доверба на граѓаните од 2 отсто. Потсетуваат и дека годишниот извештај на Европската комисија, ги потврди ставовите на Левица по однос на судството, и констатираше дека државата нема никаков напредок во оваа сфера.
