Зеленски на прес-конференцијата по средбата со шведскиот премиер Улф Кристерсон во Стокхолм истакна дека членството на Украина во ЕУ е еден од клучните основи на економската и институционалната безбедност на цела Европа.
„Разговаравме и за европските односи и за можностите за зајакнување на нашиот заеднички европски дом. Конкретно, ние веруваме дека еден од клучните основи на економската и институционалната безбедност на цела Европа е полноправното членство на Украина во ЕУ, целосното пристапување на Украина во Европската унија. Веќе оваа година ќе бидеме подготвени да ги започнеме преговорите за пристапување на Украина и важно е Шведска доследно и суштински да не поддржува на патот кон ЕУ“, изјави украинскиот претседател, пренесува Укринформ.
Тој нагласи дека едно од стратешките прашања се безбедносните гаранции за Украина на патот кон НАТО.
„Шведска ја поддржа декларацијата на Г7 за безбедносните гаранции на Украина. Благодарни сме поради тоа. И денеска нашите тимови ќе разговараат за работата на релевантниот украинско-шведски билатерален договор“, рече Зеленски
Тој додаде дека е убеден оти Украина и Шведска ќе бидат дел од Алијансата и дека ќе бидат гаранција за безбедноста, особено во регионот на Балтичкото, Црното и Азовското Море.
Украина преговара со сите членки на НАТО, кои ги повика да го поддржат влезот на Шведска во НАТО, според Зеленски.
Поточно, рече Зеленски, во преговорите со Турција биле дадени релевантни аргументи во корист на приемот на Шведска во НАТО.
„Оваа работа за поддршка на Шведска за влез во НАТО ќе продолжи и во иднина“, истакна Зеленски.
Тој, исто така, објави дека 13-тиот пакет воена помош на Шведска за Украина вклучува муниција за системи за противвоздушна одбрана, борбени возила, резервни делови и опрема за деминирање.
Украинскиот лидер ја истакна важноста на учеството на Шведска, заедно со другите меѓународни партнери, во глобалните напори за враќање на целосниот ефект на меѓународното право, кое, како што наведе, Русија се обидува да го уништи.
Од почетокот на војната, Шведска ѝ обезбеди на Украина помош од 2,2 милијарди евра и ќе продолжи да ја поддржува во нејзината борба за слобода и територијален интегритет, што во моментов е најважната задача на шведската влада на полето на меѓународната политика, изјави шведскиот премиер Улф Кристерсон на заедничката прес-конференција.
„Од февруари минатата година, Шведска ѝ обезбеди на Украина 2,2 милијарди евра помош и ќе продолжиме да обезбедуваме политичка, воена, хуманитарна и финансиска поддршка во дијалогот со вас и нашите заеднички партнери, за да се погрижиме потребите на Украина да бидат задоволени колку што е потребно“, рече Кристерсон по средбата со Зеленски.
