Имате обид на Курти да крева духови на немир, не само во Севрна Македонија, туку и на југот на Србија и сето тоа со премолчана подршка на меѓународната заедница, кажа Вучиќ.
Тој посетата на Курти на Македонија ја оцени како „скандал над скандалите“.
„Таму беше промовирана идејата за ‘голема Албанија’, истакнати се нејзините симболи, а Курти меѓу другото беше претставен како премиер на сите Албанци и премиер на Тетово“, истакна Вучиќ за ТВ Пинк.
Тој се осврна на преименувањето на улицата Втора македонска бригада во Скопје во улица на Адем Демачи, потсетувајќи дека се работи за човек кој поминал 28 години во затвор, во времето на Тито, како најлош и најголем големоалбански идеолог и сепаратист.
Тој истакна дека Демачи му бил ментор и идол на Курти и дека треба внимателно да се слуша што зборуваат луѓето како Дем Бериша, кој ги следи албанските медиуми. Вучиќ посочи дека од Приштина со пари и други работи го ставиле под своја контрола и Шаип Камбери и дека го „зедоа“ и Рагми Мустафи, со цел да произведат кризи и тема да не биде само Косово, туку и поширокиот регион и конечно да се тргне во голема Албанија.
„Тоа загрижува. Да не бевме воено толку посилни, толку пати посилни и помоќни во однос на технологијата, оружјето и сѐ друго, знаете ли колку пати Курти ќе го нападнеше секој дел од Србија? Погледнете ја неговата идеологија, тој не би ја нападнал само централна Србија, туку и Северна Македонија, Црна Гора, а прашање е што би се случило и со Албанија“, предупреди Вучиќ.
Тој истакна дека има обид Курти да дигне немири со, како што додаде, непримерен молк и премолчана поддршка на дел од меѓународната заедница.
Вучиќ истакна дека треба да се внимава зошто има обиди да се префрли вината на Србија, затоа што Косово е дете на меѓународната заедница.
