Како што јавуваат руските медиуми, Вагнер сега е единица на Руската национална гарда (Росгвардија). Станува збор за единица која е формирана на 5 април 2016 година со указ на рускиот претседател Владимир Путин и е директно под негова контрола.
Со влегувањето на Вагнер во Росгвардија Путин го постигна она што го сакаше – единицата која во јуни маршираше на Москва да ја стави под своја контрола.
Вагнер повеќе не е опасност за Кремљ, но што ќе биде во иднина?
Судејќи според повикот за регрутација објавен на Телеграм, новиот Вагнер е единица чии членови ќе бидат под договор со министерството за одбрана на Русија.
Во соопштението на групата се наведува дека во моментов во тек се нови вработувања и дека примаат кандидати на возраст од 20 до 55 години, со задолжителна обука во првиот месец.
Нова база и нови правила
Новата единица ќе има целосно нова база која се гради од нула во Северниот воен округ. Сепак, структурата, командантите и начинот на интеракција меѓу борците ќе останат непроменети. Она што се менува е изборот на регрути – новиот Вагнер, како што се тврди, нема да регрутира затвореници.
Праксата на регрутирање затвореници траеше со месеци, дури и самиот Евгениј Пригожин посетуваше затвори барајќи убијци и криминалци спремни да потпишат договор со Вагнер и да заминат на фронтот во Украина на одреден период. За возврат, ако преживеат, добиваат слобода и простување на злосторствата.
Токму оваа пракса, како и култот на Евгениј Пригожин меѓу затворениците, доведе до тоа одзивот да биде голем. На својот врв, Вагнер имаше десетици илјади борци, дури 50.000 затвореници, доброволци и поранешни припадници на специјалните сили.
Кој е Павел Пригожин?
На местото на Евгениј Пригожин, кој загина на 23 август кога неговиот приватен авион се урна во близина на Москва, доаѓа неговиот син Павел.
Пригожин своевремено зборуваше дека неговиот син Павел го отслужил воениот рок и дека еден месец по дипломирањето отишол во Сирија како „вагнеровец“, каде бил до септември 2022 година. Добил Вагнеров крст за воена служба.
„Мојот син отиде во војска со 18 години и чесно си го отслужи рокот. Еден месец откако војската замина во војната во Сирија. Од тогаш постојано беше во жариштето како дел од Вагнер, каде го доби својот прв Црн крст“, кажа Пригожин.
Се нагаѓаше дека Павел со Вагнер бил и во Украина. Повод беше фотографија која кружеше по социјалните медиуми, на која се гледа Пригожин Помладиот пред хотел во Луганск кој подоцна беше уништен во борбите меѓу Вагнер и украинската војска. Дури се нагаѓаше дека загинал во нападот на хотелот, но неговиот татко го демантираше тоа.
Го наследи Вагнер и милиони
Павел Пригожин го наследи поголемиот дел од богатството на својот татко. Не е јасно што сè наследил Павел, бидејќи не е јасно што сè поседувал Евгениј.
Во медиумите се појавија тврдења дека, покрај Вагнер, наследил и 115,3 милиони евра, троспратна куќа во Санкт Петербург, девет акционерски друштва и акции во Конкорд и царство на угостителски објекти. Овие тврдења потекнуваат од фотографија на наводниот тестамент на Евгениј Пригожин која кружеше по социјалните мрежи, а на која стои датум 2 март.
25-годишниот Павел Пригожин и пред смртта на својот татко контролирал повеќе компании и луксузни комплекси на недвижности во Санкт Петербург, покажуваат податоците на министерството за финансии на Соединетите Американски Држави кои на Пригожин Помладиот му воведоа санкции.
