Повеќе од 1.000 луѓе се собраа денеска во Будимпешта, барајќи оставка од Новак, близок соработник на премиерот Виктор Орбан, објави бриселскиот портал Политико.
Унгарските опозициски партии ја поминаа неделата повикувајќи на смена на Новак, како и Јудит Варга, поранешната министерка за правда која го потпиша помилувањето и се очекува да ја предводи листата на владејачката партија Фидес за овогодинешните избори за Европскиот парламент.
Иако беше добро познато дека Новак помилува околу 20 лица пред посетата на папата Франциско на Унгарија во април 2023 година, неодамна беше откриено дека едно од лицата кое ја искористило оваа мерка е заменик-директор на дом за деца, осуден за прикривање на сексуален престапник кој малтретирал деца во таа институција.
Новак оваа недела призна дека помилувањата предизвикале поделби, но инсистираше дека „никогаш не би помилувала педофил“.
Во обид да го смири гневот на народот поради случајот, партијата Фидес на Орбан во четвртокот поднесе уставен амандман со кој се забранува идните помилувања да имаат корист на кој било начин на лицата осудени за злосторства против деца.
