Истовремено, соопштуваат оттаму, раководниот тим на ИСОС одлучил, од средината на март, односно по завршување на поднесувањето на годишните завршни сметки, да спроведе сеопфатно анкетно истражување помеѓу професионалните сметководители, а сознанијата што ќе се добијат преку истражувањето ќе бидат искористени за да се направи детална анализа на состојбата со цените на сметководствените услуги на пазарот и на платите во овој сектор.
„Оваа анализа ќе биде добра основа за креирање на најсоодветни одржливи решенија и механизми за утврдување на препорачани цени на секоја посебна сметководствена услуга, водејќи сметка за нивото на нивна сложеност. Следниот чекор ќе биде да се пронајде најсоодветниот начин и форма за имплементација на ваквото решение, водејќи сметка за законските надлежности што ги има Институтот“, вели претседателката на ИСОС, Весна Прентоска.
Имајќи ја предвид големата одговорност што ја имаат професионалните сметководители во водењето и евиденцијата на сите финансиски текови, потенцира Прентоска, како и поставената цел за натамошно јакнење и унапредување на сметководствената професија, вклучувајќи ја потребата од целосно сузбивање на работењето во таканаречената сива зона, појава која сѐ уште е присутна и нанесува штета на целата професија, ИСОС ќе направи сѐ што е потребно и што е во негова моќ да се креира и имплементира ефикасно решение кое ќе овозможи соодветно вреднување на вложениот труд и вредноста на сметководствените услуги.
