Киев извести дека доцна синоќа биле соборени четири беспилотни летала „шахед“ од иранско производство над регионите Харков и Доњецк. „Петтото беспилотно летало го напушти воздушниот простор на Украина во правец на регионот Гомел во Белорусија“, напиша командантот на украинските воздухопловни сили Микола Олешук на каналот Телеграм.
Белорускиот воен блог Хаџун проект го потврди инцидентот, велејќи дека руско беспилотно летало три часа летало над Белорусија и стигнало до североисточниот град Витебск. Не е јасно што се случило со дронот потоа, за кој блогот пишува дека го следеле белоруски борбен авион и хеликоптер.
Според Хаџун проект, сличен инцидент се случил доцна во четвртокот, кога руско беспилотно летало „шахед“ полетало во белорускиот воздушен простор пред да се врати во Украина, во близина на ограничената зона околу нуклеарната централа Чернобил.
Белорусија се смета за најблизок сојузник на Русија.
Претседателот на Белорусија, Александар Лукашенко им помогна на руските сили да се распоредат против Украина, без директно да се вклучи во конфликтот. Тензиите повторно се зголемија во последните денови, а во Белорусија во моментов се одржуваат заеднички воени вежби меѓу кинеските и белоруските сили.
