Според Фајненшл тајмс, јужнокорејскиот претседател Јун Сук Јеол размислува да испрати оружје во Украина како одговор на испраќањето севернокорејски војници во Русија. Јужна Кореја уште во октомври предупреди дека ќе го разгледа потегот со цел да изврши притисок врз Русија да не ги ангажира севернокорејските трупи во својата војна против Украина – што Русија го направи.
Извештаите од САД, Јужна Кореја и Украина наведуваат дека повеќе од 10.000 севернокорејски војници биле испратени во Русија во октомври, а некои сега активно се вклучени во борбени операции на првата линија.
„Сеул мора да разбере дека евентуалната употреба на јужнокорејско оружје за убивање руски граѓани целосно би ги уништила односите меѓу нашите земји. Се разбира, ние ќе одговориме на сите начини што ги сметаме за неопходни. Малку е веројатно дека тоа ќе ја зајакне безбедноста на самата Република Кореја“, рече Руденко. „Се надевам дека администрацијата на Република Кореја првенствено ќе се води од долгорочните национални интереси, а не од краткорочните опортунистички размислувања наметнати однадвор“, додаде тој.
Уште во јуни оваа година, пред да бидат испратени севернокорејски војници во Русија, рускиот претседател Владимир Путин ја предупреди Јужна Кореја дека Москва „ќе донесе одлуки кои веројатно нема да им одговараат на сегашните лидери на Јужна Кореја“ доколку одлучат да достават оружје во Киев.
Путин ги даде коментарите за време на говорот во Виетнам, по посетата на Пјонгјанг, каде што потпиша договор за заемна одбрана со севернокорејскиот лидер Ким Џонг Ун. Тогаш двете земји се обврзаа да ги зајакнат воените врски.
Фајненшл тајмс наведува и дека Јун и други високи функционери во Сеул веруваат дека директното учество на Пјонгјанг во руско-украинската војна може да претставува закана за безбедноста на Јужна Кореја. Освен тоа, изразена е загриженост дека Москва испраќа софистицирани воени технологии во замена за поддршката од Пјонгјанг.
Андриј Коваленко, шеф на Центарот за борба против дезинформации при Советот за национална безбедност и одбрана на Украина, на Телеграм напиша дека некои севернокорејски војници биле преместени во регионот Белгород. Овој регион се наоѓа јужно од Курската област и директно спроти Харковската област во Украина.
Заменик-порпаролката на Пентагон, Сабрина Синг, изјави за новинарите дека се верува дека околу 11.000 севернокорејски војници влегле во регионот Курск во Русија.
Во новата проценка на Институтот за проучување на војната се наведува дека руските трупи неодамна напредувале во областа Курск, која моментално е под контрола на украинските сили. Во август Киев започна ненадејна операција во областа Курск и оттогаш Русија се бори да одговори на најголемиот украински упад на руска територија од почетокот на војната. САД очекуваат севернокорејското засилување наскоро да биде распоредено на фронтот.
