Со мнозинство од четири од седум судии, Врховниот суд во Колорадо го направи Трамп прв претседателски кандидат во историјата на САД кој се смета за несоодветен за Белата куќа. Тие се повикаа на ретко користената одредба од американскиот Устав со која се забранува службени лица кои учествувале во „бунт“ да извршуваат функции. Одлуката се однесува само на републиканските предизбори во Колорадо на 5 март, но може да влијае на статусот на Трамп во државата за општите избори на 5 ноември.
Непартиски прогнозери за американските избори го гледаат Колорадо како претежно демократски, што значи дека претседателот Џо Бајден најверојатно ќе ја води државата без оглед на судбината на Трамп таму. Трамп вети дека ќе ја обжали пресудата до Врховниот суд на САД, а судот во Колорадо најави дека ќе го одложи ефектот на својата одлука најмалку до 4 јануари 2024 година, за да дозволи жалба.
Пресудата ја поставува сцената за американскиот Врховен суд, чие конзервативно мнозинство во однос 6-3 вклучува тројца именувани од Трамп, да размисли дали Трамп има право да служи уште еден претседателски мандат.
Тужбата се смета за тест случај за пошироките напори да се дисквалификува Трамп од државните гласања според делот 3 од 14-тиот амандман, кој беше донесен по Граѓанската војна во САД за да се спречат поддржувачите на Конфедерацијата да служат во владата.
Судот во Колорадо пресуди дека Уставот на САД му забранува на Трамп, фаворит за републиканска номинација во 2024 година, да се појави на гласачкото ливче поради својата улога во поттикнувањето насилство во Капитол додека пратениците се состануваа да ги потврдат резултатите од изборите во 2020 година.
Историското обвинение против поранешниот претседател на 1-ви август на федерално ниво, а потоа и на 14-ти август од државата Џорџија за неговите наводни незаконски обиди да добие поништување на изборните резултати во 2020 година отвори правна дебата за неговата можна неподобност, што доведе до жалби во неколку држави.
Но, од околу петнаесет постапки кои се во тек во различни држави, вклучително и две отфрлени во Минесота и Мичиген, судовите во Колорадо беа првите што го прогласија Доналд Трамп за неподобен. „Не ги носиме овие заклучоци лесно“, напишаа судиите од мнозинството.
„Свесни сме за големината и тежината на прашањата што се сега пред нас. Свесни сме и за нашата свечена должност да го применуваме законот, без страв или наклонетост, и без да бидеме поколебани од реакциите на јавноста на одлуките што законот бара од нас да ги донесеме“, додаваат тие.
Кампањата на Трамп ја нарече одлуката на судот „недемократска“. „Врховниот суд во Колорадо донесе погрешна одлука вечерва и ние брзо ќе поднесеме жалба до Врховниот суд на САД“, изјави портпаролот на кампањата на Трамп.
