Од првиот ден се зафативме со тој проблем. Сите подготовки веќе се при крај и за тоа во наредните недели ќе излеземе со комплетен предлог, конкретен центар кај ќе се лекуваат, најсовремен досега и тој проблем веќе мислам дека пополека ќе го решиме, изјави министерот за здравство Фатмир Меџити, прашан дали и како ќе се реши тоа што лицата со цистична фиброза над 26 години сами си ги плаќаат лекарствата.
„За тоа кој како ќе прима терапија, сепак секогаш ќе одлучат стручните кадри, комисија, сите кои треба да примат, кои не треба, до која година, ќе одлучат професионалците“, додаде Меџити.
Во Собранието минатата седмица не помина предлогот за ослободување од партиципација од медицински услуги и лекови на пациенти со цистична фиброза над 26 години. Како што биле информирани членовите на Асоцијацијата за цистична фиброза, пациентите биле ослободени од партиципација уште во 2019 година.
Асоцијацијата за цистична фиброза бара решение подолго време за овој проблем. Оттаму се надеваат дека и покрај гласањето против, и со документот од 2019 година дека лицата со цистична фиброза се ослободени од партиципација, конечно ќе се најде решение со што пациентите најпосле ќе се ослободат од овој финансиски товар.
Александар Стамболиски кој има 26 години, минатата седмица се осврна на трошоците околу терапијата за оваа болест, во просек месечно околу седум илјади денари за пациент со цистична фиброза. Ако има компликации, потребни се повеќе финансиски средства.
Моментално, 12 пациенти добиваат „трикафта“, лек со кој се олеснува болеста и лицата со оваа болест може да функционираат без проблеми. Асоцијацијата за цистична фиброза се бори лекот да го добијат сите пациенти во државата.
Во Министерство досега нема пријавено дека пациентите немаат инсулин ленти, одговори Меџити на новинарско прашање, дека пациенти кои се на инсулин немаат ленти, па дали ќе побара одговорност бидејќи овие луѓе, според закон, мора да имаат редовно и инсулин и ленти, а се случува да нема.
„Сите пациенти се снабдени со сѐ. Не е само тоа, сега ќе има и сензори за првпат во државава, во здравството за тие пациенти од тој вид болест, што никогаш немало досега и со тоа нормално ќе се подмират сите работи, рече Меџити.
Прашан околу рефундирање на парите на оние кои сами си купиле ленти, тој одговори дека доколку има такви барања во Министерството, согласно закон, би се разгледале и ќе се одлучи за нив.
На министерот му беше поставено и прашање зошто како Министерство за здравство, како и Фондот за здравствено осигурување, не понудиле некоја помош за лекувањето на Кико, за што граѓани собираа финансиски средства, „а од друга страна, платите на функционерите се зголемија, зошто не се донираа“?
„Ние сме државни институции, колку што сум јас информиран од службите пак барање не е поднесено на ниво во Министерството за здравство, ниту во Фондот. Такви служби или барања до Министерството до институциите надлежни, досега немало. Ние ќе го разгледаме случајот, нормално фамилијата треба да поднесе барање… Знам се зборува ретка болест, тешка болест, но нема поднесено барање до надлежните институции и да разјасниме, тој случај досега не се лекувал во јавно здравје. Четири – пет години не биле на преглед. Така да, ние не знаеме што се случува. Ова се државни институции здравствени и треба да има службено барање за да се разгледува“, одговори Меџити.
Тој додаде дека секогаш се тука за пациентите и кога би имало такво барање, тие би го разгледале и би постапиле согласно законите за заштита.
