Литванците денеска гласаат во првиот круг од парламентарните избори што може да доведе до смена на владејачката централно-десничарска коалиција, со нова коалиција која се очекува да биде составена од опозициските социјалдемократи и помалите централно-левичарски партии.
Околу 2,4 милиони луѓе имаат право во два круга да изберат 141 пратеник во Парламентот или Сеимас за четиригодишен мандат.
Денеска на партиските листи ќе се избираат 70 пратеници, на кои им се придружуваат и оние изборни единици од еден мандат кои ќе успеат да освојат повеќе од 50 отсто од гласовите.
Вториот круг од изборите е на 27 октомври, кога мнозинството едночлени изборни единици ќе гласаат за избор меѓу двајцата водечки кандидати.
Пред денот на изборите своето право за време на тридневното предвремено гласање го искористиле 236.540 гласачи или 10,25 отсто од избирачите, пренесува литванскиот сервис ЛРТ.
Избирачките места се затвораат во 20 часот.
Според анкетата објавена на 4 октомври, која е нарачана од дневниот весник „Лијетувос ритас“ и се базира на околу 1.000 интервјуа на граѓани, Социјалдемократската партија на чело со Вилија Блинкевичиуте, поранешна министерка за труд и социјала, ќе победи со 18 отсто или двојно повеќе гласови од Татковинскиот синдикат на актуелната премиерка Ингрида Шимоните која би добила девет отсто од гласовите.
Новата партија на Немуно Аушра, политичарот од десниот центар Ремигиус Жемаитаитис, кој беше отповикан на почетокот на оваа година поради давање антисемитски изјави, ќе има 12 отсто од гласовите.
