Неименуван израелски функционер за американската телевизија Си-ен-ен изјави дека израелската влада го организирала состанокот во време кога лидерите на земјата оценуваат како треба да одговорат на иранскиот ракетен напад што се случи на 1 октомври. Точниот датум и локација на средбата сѐ уште не се познати.
„Иран ќе возврати на секој нов напад од Израел“, изјави за Си-ен-ен извор од Техеран запознаен со дипломатските разговори. Според овој извор, Иран веќе ги информирал САД и некои земји од Блискиот Исток за својата намера да одговори на секој понатамошен израелски напад.
Иранскиот балистички напад на 1 октомври следуваше по убиството на лидерот на Хамас, Исмаил Ханије во Техеран во април, како и атентатот на лидерот на Хезболах, Саид Хасан Насрала и иранскиот воен советник бригадниот генерал Абас Нилфорушан во септември.
За време на операцијата, Иран лансираше околу 200 балистички ракети кон Израел, при што 90 отсто од ракетите наводно ги погодиле нивните наменети цели.
Министерот за одбрана на Израел, Јоав Галант, изјави дека одговорот на Израел кон Иран ќе биде „смртоносен, прецизен и изненадувачки“.
Целиот регион веќе е зафатен од конфликт. Израел ги засили воените операции во Појасот Газа, наредувајќи евакуација и блокирајќи ја испораката на храна во палестинската енклава. Тензиите се зголемуваат и на израелско-либанската граница, каде десетици земји ги осудија нападите врз мировниците на Обединетите нации, пренесува Си-ен-ен.
Израелските воздушни напади и копнената инвазија ставија четвртина од Либан под наредба за евакуација, либанскиот премиер повторно повика на прекин на огнот.
