Право на учество на конкурсот со свои проекти имаат и јавни и приватни институции од сферата на образованието, обуката, младите и спортот од Македонија, која е опфатена со програмата Еразмус+, заедно со сите 27 членки на ЕУ, трите држави од ЕФТА – Исланд, Лихтенштан и Норвешка, како и Србија и Турција.
Одвеоената сума за следната година е за 6,5 отсто повисока од оваа што беше наменета за проекти од конкурсот за оваа година.
Според потпретседателот на Европската комисија за промоција европскиот начин на живот Маргаритис Схинас, преку Еразмус+, ЕУ не ги поддржува само образованието и мобилноста, туку ги промовира и вредностите што ја обединуваат Европа, како што се солидарноста, инклузивноста, демократијата и почитувањето на човековите права.
„ Додека сме свртени кон иднината, Еразмус+ ќе продолжи да ги поддржува овие фундаментални вредности, помагајќи да се изгради Европа која е покохезивна, отворена и обединета во различностите“, додаде Схинас.
Еврокомесарката за иновации, истражување, култура, образование и млади, Илијана Иванова истакна дека Еразмус+ е една од најуспешните приказни на ЕУ, која ги трансформира животите и ги поврзува луѓето преку образованието, обуката и спортот, речиси четири децении.
„ Со петте милијарди евра наменети за програмата во 2025 година, ги прошируваме можностите за учење во странство и поттикнуваме поголема вклученост и соработка низ Европа. Додека продолжуваме да поддржуваме милиони учесници, вклучително и оние со помалку можности, Еразмус+ останува во центарот на градењето на посилна, пообединета и напредна Европа“, заклучи Иванова.
Од создавањето на програмата Еразмус+ во 1987 година, ЕУ досега финансиски поддржа преку 16 милиони учесници на нејзините конкурси. Сега Еразмус+ дополнително е посветана на поддршка на поединци со помалку можности, поради што фокус е ставен на иницијативата „Европа во движење“, која поставува амбициозни цели за зголемување на мобилноста и учеството пред сè на недоволно застапените групи.
Дополнително, Еразмус+ продолжува да поддржува различни модели на соработка, како планот за „европска диплома“, односно признавање на стекнатите квалификации надвор од границите на матичната земја и за унапредувањето на соработката помеѓу високообразовните институции и студентската размена како дел од напорите за изградба на поинтегриран европски образовен систем.
