„Владата на денешната седница го задолжи министерот за економија, на првата наредна седница на Владата на Република Северна Македонија, да ја информира Владата за сите управни и судски постапки (одлуки, заклучоци и информации) поврзани со експлоатацијата на минерална суровина – руди на бакар и злато на локалитетот с. Иловица, Општина Босилово, почнувајќи од првата одлука до денес. Одлучено е, по информацијата до Владата, Министерството за економија да ги сподели сите информации во неа и со новинарите и јавноста“, се вели во владиното соопштение.
Вицепремиерот Фатмир Битиќи на заедничката прес-конференција со синдикатите, одговарајќи на новинарско прашање, рече дека Министерството за економија на првата наредна седница, односно наредниот вторник. треба да ја информира Владата за сите управни и судски постапки, одлуки, заклучоци и информации за локалитетот Иловица, наназад од 2012 година па до денеска.
„Се што е поврзано со експлоатацијата на минералните суровини, руди на бакар и злато на локалитетот Иловица штом Министерството реферира со сите податоци, велам уште еднаш управни и судски постапки кои се водени, тие веднаш ќе се споделат, не само со владата туку и понатаму со медиуимте и граѓаните“, истакна Битиќи.
Инаку, во саботата во Струмица се одржа протест на граѓани и невладини организации од кој беше испратена пораката дека нема да се дозволи отворање на рудници, а на протестот беа присутни и министерките за животна средина и за труд и социјална политика кои истакнаа дека и самите се против отворање на рудници. Потоа премиерот Димитар Ковачевски од Скопје порача дека концесиите биле дадени уште во времето на Владата на Никола Груевски и дека СДСМ во принцип е против отворање на тие рудници, а дека при носењето на одлуката ќе го имаат предвид ставот на граѓаните.
Од компанијата Еуромакс рисорсис порачаа дека поради протестот и евентуална за нив неповолна одлука на Владата, Македонија може преку арбитражна судска меѓународна одлука да загуби една милијарда евра како отштета за компанијата.
