Бајден во Хелсинки ќе учествува на американско-нордискиот самит со лидерите на Финска, Шведска, Данска, Исланд и Норвешка, по што ќе одржи заедничка конференција со финскиот претседател Саули Нинисто, пренесува Ројтерс.
Неименуван официјален претставник рече дека американскиот претседател ќе го поздрави влегувањето на Финска и идното членство на Шведска во НАТО.
„Гледаме целосна промена во европската безбедносна структура, како резултат на потезите на Русија, а нордиските земји се приближија кон Западот, како одговор на агресивните и дестабилизирачки акции на Русија“, изјави тој за агенцијата.
Се очекува тема на разговорот меѓу другото да бидат климатските промени и новите технологии.
Пред да замине во Финска, Бајден беше во Вилнус, каде што се одржа дводневен самит на НАТО, а посетата на Европа ја започна со заминување во Лондон, каде што се сретна со кралот Чарлс Трети.
