Амбасадата на Соединетите Американски Држави во Србија соопшти дека американското Министерство за финансии изрече санкции на директорот на Безбедносно-информативната агенција (БИА) и нагласи дека оваа акција не е насочена кон ниту една од институциите на Србија.
„САД се цврсти во своите напори да ги разоткријат оние кои се вклучени во коруптивните и дестабилизирачки активности кои го поткопуваат владеењето на правото на Западен Балкан и го продлабочуваат малигното влијание на Русија во регионот“, се вели во соопштението на амбасадата објавено на Твитер.
Ministarstvo finansija SAD uvelo je sankcije Aleksandru Vulinu, direktoru Bezbednosno-informativne agencije, nekadašnjem ministru odbrane i unutrašnjih poslova. Ova akcija nije usmerena ni na jednu od institucija Republike Srbije. SAD su nepokolebljive u naporima da razotkriju…
— Američka ambasada (@USEmbassySerbia) July 11, 2023
САД, како што се додава, продолжуваат да ги поддржуваат граѓаните на Србија на патот кон реформите во правосудниот систем, борбата против корупцијата и создавањето подобра иднина.
Американското Министерство за финансии, кое воведе санкции против Вулин, поранешниот министер за армија и полиција, го обвинува за вмешаност во „организиран криминал, трговија со дрога“, како и дека злоупотребувајќи ја својата јавна функција му помогнал на трговецот со оружје Слободан Тешиќ неговите „нелегални пратки со оружје слободно да се движат низ границите на Србија“ и со тоа и обезбедил на Русија „платформа за натамошно, малигно влијание во регионот“, пренесува регионалната телевизија Н1.
