Како што информираа вчера од кабинетот на претседателот на Парламентот, Законот веќе е доставен до пратениците и е предложен да се носи по скратена постапка.
Ковачевски изјави дека предлог-законот за амнестија е направен за дела од помал обем, со намера за релаксирање на пренатрупаните капацитети во затворот Идризово и во другите сместувачки објекти во рамките на Управата за извршување на санкции.
„Законот беше изработуван неколку месеци од страна на Министерството за правда и откако беше изработен беше испратен до сите пратенички групи во Собранието, вклучително и до пратеничката група на ВМРО-ДПМНЕ и затоа не е точно дека не го виделе законот. Диверзитетот на различни мислења кои постојат за законот се добри и можат да се земат различни аспекти во однос на ефектите на законот“, потенцираше вчера премиерот.
Според Ковачевски, за законот има различни мислења од кои дел се водат од хумани, а дел од рационални причини.
„Ист ваков закон се донесе во 2018 година и тогаш сите го поддржаа. Сега предложениот закон е дури и порестриктивен. Бројот на места во затворите е околу 2.113 колку што во моментов има лица во затвори. На издржување на казна чекаат уште 2.200 лица што значи дека во моментов се потребни 4.000 места за да се сместат сите кои чекаат за издржување на казна“, додаде премиерот.
Транспарентност при носење на овој закон очекува претседателот на Судски совет, Сашко Георгиев. Тој вчера порача и оти очекува да се добијат одговори од кои причини се носи овој закон, но и кои се ефектите.
„Очекувам да бидеме вклучени во некој дел од целата таа процедура со свое мислење како Судски совет, како судска фела. Колку што знам јас дека е во процедура, како ќе помине тоа останува на законодавниот дом“, рече вчера Георгиев.
Премиерот Ковачевски да не се однесува како турист на владините седници кога носат законски решенија како она за законот за амнестија за потоа уште не стигнати до Собрание да најавува нови амандмани на закон кој ја поминал процедурата на Илинденска и ресорното министерство, изјави деновиве Христијан Мицкоски, лидерот на ВМРО-ДПМНЕ.
Ковачевски на седницата за пратенички прашања најави дека пратеничката група на СДСМ ќе ги разгледа можностите за да поднесе амандман во Собрание за предлог законот за амнестија за да не може да се амнестираат осудените за помагање во „Монструм“. Според предложениот закон за амнестија двајца осудени за убиството на петмината кај Смилковско езеро во случајот Монструм може да бидат амнестирани.
Мицкоски е на ставот дека министерот за внатрешни работи Оливер Спасовски треба да ја напушти Владата доколку не се согласува со законот за амнестија.
„Спасовски има две опции. Едната опција е ако не се согласува да ја напушти владата. Втората опција која ја има Спасовски е да молчи и да прифати дека тие коишто се опфатени со овој закон се озлогласени криминалци, луѓе кои што тргувале со недозволени супстанци или познати како нарко дилери, переле пари, вршеле изнуда, правеле насилство и така натаму. И тие треба да добијат намалени затворски казни или дел од нив да добијат и целосна амнестија, за да потоа се најдат повторно на улиците и да повторно прават проблеми и го тероризираат чесниот граѓанин во Македонија“, изјави Мицкоски.
Инаку, со новиот предлог закон за амнестија, од вкупно 2.114 затвореници низ државата, целосно се ослободуваат 286 лица, а делумно ослободување од ефектот на 30 проценти добиваат 996 затвореници.
Оваа бројка се однесува на лицата кои што се веќе сместени во затворите низ државава, додека, за оние 2.813 кои чекаат да влезат во затвор ќе има дополнителен список од Управата за извршување санкции.
