Паролата ја објави унгарскиот министер за европски работи Јанош Бока на конференција за новинарите пред почетокот на претседавањето.
„Нашиот слоган упатува на идејата на претседателството кое е активно и на теренот, на тоа дека сме посилни заедно, со почитување на сопствениот идентитет“, им кажа на новинарите во Будимпешта Бока.
Тој не сакаше да го уфрли Трамп во приказната, одговарајќи дека не е сигурен „дека претседателот Трамп некогаш сакал Европа повторно да биде голема“.
Покрај слоганот, претставено е и логото на претседавањето, Рубикова коцка која Бока ја опиша како „суштината на унгарскиот гениј’.
Унгарија дефинираше седум приоритети меѓу кои јакнење на конкурентноста на блокот, борбата против нелегалните миграции, што е една од главните политики на унгарската влада.
Министерот кажа дека Унгарија ќе го искористи своето претседавање со ЕУ за да воведе нов земјоделски договор фокусиран на земјоделските произведувачи и поефикасна заштита на надворешните граници за да ја сузбие миграцијата, и да ја подобри политиката на враќање, пренесува Политико.
Истовремено Бока кажа дека ќе се работи на напредувањето кон ЕУ со фокус на Западен Балкан, Украина, Молдавија и Грузија.
„Сакаме стратегија на проширување заснована на заслуги со конкретни цели на Западниот Балкан“, кажа тој и кажа дека ќе бараат опипливи чекори „во однос на Молдавија, Грузија и Украина“.