Тој го отфрли предлогот на Путин, оценувајќи дека не станува збор за сериозен обид да се постигне договор за мир и дека не е релевантен за какви било преговори. Подолјак за Ројтерс додаде дека „не постои можност да се најде компромис“ меѓу изјавите на Путин и условите за крај на војната на Киев.
Путин претходно денес изјави дека Украина мора да ги повлече своите трупи од целата територија анектирана од Русија и да се откаже од намерата да влезе во НАТО за да почнат мировни преговори. Тој наведе дека украинските трупи мора да се повлечат од териториите на самопрогласените Луганска и Доњецка Народна Република, како и од Херсонската и Запорошката област.
„Штом Киев изјави дека е спремен за таква одлука и почне навистина да ги повлекува трупите од овие региони, и официјално ќе извести за откажување од плановите за влез во НАТО, ќе следи веднаш, буквално во истата минута, наредба од наша страна за прекин на огнот и почнување на преговорите. Повторувам, ќе го направиме тоа веднаш“, истакна Путин.
Тој истакна дека на Москва за мирно решение ѝ е потребен неутрален, вонблоковски, ненуклеарен статус на Украина.
