Според извештаите, новоизбраниот претседател планира да издаде наредба по инаугурацијата на 20 јануари со која ќе им се забрани на трансродовите лица да служат во војска, а потоа ќе отпушти илјадници трансродови војници кои моментално се активни поради, како што вели Трамп, медицински причини.
Трамп во 2017 година, изјави дека САД повеќе нема да „прифаќаат или дозволуваат“ трансродови лица во војската, наведувајќи ги „огромните медицински трошоци и нарушувања“. Таа забрана стапи на сила во 2019 година.
Претседателот Џо Бајден ја смени политиката, која беше предмет на неколку тужби. Сега се очекува Трамп веднаш да ја повлече наредбата на Бајден и да ги отстрани активните трансродови војници од службата, објави Тајмс, повикувајќи се на извори запознаени со плановите на новоизбраниот претседател.
Извршната акција е една од низата наредби што Трамп планира да ги издаде веднаш по своето враќање во Белата куќа, вклучително и опсежни мерки за имиграција, за кои се очекува да предизвикаат значителни правни битки.
За време на кампањата, Трамп заедно со републиканските групи потроши десетици милиони долари на анти-транс реклами. Тој вети дека ќе стави крај на граѓанските права за ЛГБТ луѓето, ќе им забрани на транс лицата да учествуваат во спорт и ќе ја забрани здравствената заштита на младите поврзана со промената на полот.
Кандидатот на Трамп за секретар за одбрана, кој ќе биде задолжен за 3 милиони воен и цивилен персонал ширум светот, ја поддржа неговата претходна забрана за трансродови војници и рече дека транс лицата „не се подготвени за распоредување“ и предизвикуваат „компликации“. Во моментов во вооружените сили на САД служат околу 15.000 трансродови лица.
„Овие лица ќе бидат принудени да ја напуштат службата во време кога војската не може да регрутира доволно луѓе“, изјави за Тајмс извор запознаен со плановите на Трамп.
„Забраната за трансродовите лица ќе ја загрози подготвеноста на војската и ќе создаде уште поголема криза во регрутирањето и задржувањето на кадарот, истовремено сигнализирајќи ранливост на американските противници“, изјави за Тајмс Рејчел Бранаман, извршна директорка на Модерната воена асоцијација на Америка.
„Наглото отпуштање од работа на повеќе од 15.000 војници, особено затоа што целите за воено регрутирање минатата година останаа покуси за 41.000 регрути, ќе го зголеми административниот товар на борбените единици, ќе ја наруши кохезијата на единиците и ќе ги влоши критичните недостатоци во вештини“, додаде таа. „Тоа би имало значителни финансиски трошоци, како и губење на искуство и лидерство што би можело да потрае 20 години и да чини милијарди долари за да се надоместат“.
Пауло Батиста, трансродовиот аналитичар во морнарицата, изјави за Тајмс дека забраната ќе има далекусежен ефект врз вооружените сили. „Ако отстраните 15.000 од нас – можеби и повеќе, но тоа е бројката што најчесто се споменува – тоа се 15.000 лидерски позиции. Секој од нас има клучна улога“, рече Батиста.
