„Нека се пофалат моите претходници дека истото го сториле за еден ден за неколку други случаи кои се интересни за јавноста. Многу ми е жал што досега не се постапувало така, како во последните шест – седум година, така и претходно, но тоа време заврши. Припадник на МВР сторил насилство со коешто ја погазил честа на службите во Министерството, па и честа на Македонија. Согласно првичните информации, тоа лице ќе биде суспендирано од работа сè до донесување на правосилна пресуда, а МВР се надевам уште во текот на овој ден ќе поднесе кривична пријава за напад на службено лице“, рече Тошковски во одговор на прашање на одбележувањето на Денот на Одделот за заштита на определени личности и објекти при Министерството за внатрешни работи.
Тој нагласи дека со тоа постапката во МВР експресно ќе биде завршена и додаде дека ќе информира веднаш штом ќе биде поднесена кривичната пријава.
„Во овој случај веднаш излегов со осуда за насилство штом ја добив информацијата, особено затоа што станува збор за насилство на припадник од МВР. Во делот на тоа дека предметното лице попречувало одредена акција при нејзино спроведување, сакам да потенцирам дека тоа е неточно, односно предметното лице во конкретнава ситуација коешто сторило напад на службено лице влегло во акција откако акцијата на службените лица во предметниот објект била завршена. Ова го кажувам исклучиво само заради тоа што гледам некои обиди за дефокус, обиди за манипулација“, рече Тошковски.
Дополнителниот заменик министер за внатрешни работи Митко Бојмацалиев посочи дека во неговиот фејсбук статус не коментирал кого обезбедува лицето и каде работи, туку само информирал дека се работи за лице кое е припадник на МВР и кое претходно извршувало високи функции во Министерството. Побара по закон максимално професионално да се изврши целата истрага и да се дојде до крајот без никакви политички заднини од која било партија.
„Не ме интересира ни една ни друга партија. Тука се работи за напад на припадник на македонската полиција, а напад на полицаец е напад на државата и барам и судството и обвинителството сериозно да постапат по овој случај во рамките на доказите што ќе ги обезбедат. За мене како човек и носител на оваа функција е недозволиво да има такви инциденти. Затоа повикав и вчера, а и денеска ќе повикам, внатрешната контрола и сите истражни органи максимално професионално да го испитаат случајот до крај без политички заднини. Барам како што е по закон така да постапат“, изјави Бојмацалиев.
За мене, додаде, е неприфатливо припадник на македонската полиција да спречува друг припадник во вршење на службени дејствија, посебно кога се работи за дрога.
„Никој нема поддршка ниту ќе има поддршка од мене за таа работа. Политичките партии да се воздржат од тоа дали некој ќе бил обезбедување или нема да биде обезбедување. Тоа кажуваме ние во МВР кој ќе биде обезбедување до кога и каде“, порача Бојмацалиев.
