Пекинг ги засили воените активности во пресрет на претседателските и парламентарните избори во Тајван на 13 јануари. Односите со Кина се главна точка на расправа во предизборната кампања.
Островот, кој има демократски избрана влада и кој Кина го смета за своја територија, веќе четири години се жали на редовни кинески воени патроли и вежби во неговата околина.
Министерството за одбрана на Тајван соопшти дека забележало ловци Ј-10, Ј-11 и Ј-16, како и авиони за рано предупредување кои дејствуваат во воздушниот простор северно и југозападно од Тајван, пренесува Ројтерс.
Десет авиони ја поминале средната линија на Тајванскиот теснец, соопшти Министерството.
Средната линија некогаш служела како неофицијална бариера меѓу двете страни, но кинеските авиони сега редовно летаат над неа.
Тајван испрати свои сили да ја надгледуваат областа, соопшти Министерството.
