„Тоа беше место каде што луѓето одат да добијат грижа што ја обезбедува навистина добар здравствен систем, што сите ние го очекуваме во нашите општества ако ни треба“, истакна таа.
Израелските сили вчера ја напуштија болницата Ал Шифа во градот Газа по двонеделна операција на специјалните сили, при што беа приведени стотици осомничени палестински милитанти, оставајќи пустош и уништени згради.
Набргу по повлекувањето на израелската војска, Фарес Афана шефот на екипата за брза помош на северот на градот изјави дека во уништениот болнички комплекс Ал-Шифа „насекаде има мртви“ и дека „никој не беше поштеден“.
Болницата Ал-Шифа, најголемата во Појасот Газа, е во урнатини, „целосно уништена“, изјави Афана за АФП. „Масакрите на цивили и деца мора да престанат. Никој не беше поштеден“, рече тој.
„Медицинските екипи сè уште ги собираат телата и ранетите околу и внатре во болничкиот комплекс“, рече тој. „Она што се случува овде е катастрофа против човештвото и здравствениот систем во Појасот Газа“, рече тој.
Зградите во комплексот се „изгорени и уништени“, додаде тој, критикувајќи ја „одмаздата на окупаторските сили“. Тој го повика светот „да го запре колежот на палестинскиот народ“.
Еден човек покажа на телата расфрлани по патот. „Нема ниту еден кревет“, рече тој, одбивајќи да го каже своето име. „Ќе бидеме закопани овде и нема да заминеме од тука“.
Припадник на итната служба изјави дека е „изненаден од неверојатната тишина на меѓународната заедница и арапскиот свет“. „Кога ќе се поместат? Кога ќе биде уништен целиот палестински народ?“, праша тој.
