Станува збор за хуманитарен настан, утре во 12 часот во дворот на гимназијата, за помош на бездомните животни, зад чија организација стојат ученици и професори од гимназијата.
За бездомните животни ќе може да се донираат храна, ќебиња, играчки и други работи, а дополнително ќе биде организиран хуманитарен базар каде ќе се продаваат разни рачни изработки. Исто така, овој настан ќе биде можност да се разговара за многуте прашања поврзани со заштитата и грижата за бездомните животни како и за проблемите што скопските населби ги имаат со кучињата скитници.
Од гимназијата велат дека новинарите ќе имаат можност да се запознаат со Коста, – омиленото куче меѓу учениците, кому училиштето „Никола Карев“ му стана дом. Коста за својата куќичка ќе добие топли прекривки и храна. По желба, велат од гиманзијата, ќе може да се организира „интервју“ со Коста.
„Спаси живот, вдоми љубов“, е мотото на гимназијата „Никола Карев“, првото пет френдли училиште, а учениците велат: „Во училницата на животот, сите добиваме најдобри оценки кога делиме љубов“.
Настанот е вовед во големиот јубилеј на гимназијата „Никола Карев“ – 80 години постоење.
