Додека руското шпионирање во другите земји во Европа и Северна Америка беше ослабено со протерувања, руските агенти продолжија да дејствуваат во Берн, главниот град на Швајцарија, и во мисијата на Москва во Обединетите нации во Женева, вели ФИС во својот годишен извештај.
„Во Европа, Швајцарија е една од земјите со најголем број руски разузнавачи што работат под дипломатски параван, делумно поради нејзината улога како домаќин на меѓународните организации“, се вели во извештајот објавен во понеделникот.
ОН имаат свој европски центар во Женева, а градот е домаќин и на неколку агенции на ОН и меѓународни организации. Стотици дипломати се стационирани во градот или редовно се собираат на клучните состаноци.
„Од приближно 220 лица акредитирани како дипломатски или техничко-административен персонал во руските мисии во Женева и Берн, веројатно најмалку една третина работат за руските разузнавачки служби“, рече на прес-конференција шефот на ФИС, Кристијан Даси.
Швајцарската тајна служба, која има 450 вработени, соопшти дека војната во Украина ја принудила да го прошири надзорот во областите на кои претходно им било посветено малку внимание, како Турција и Индија, бидејќи Русија во тие земји користела компании за набавки.
Иако се верува дека и Кина има десетици шпиони во своите дипломатски претставништва во Швајцарија, нивниот број е значително помал од рускиот, наведува агенцијата.
Кинеските агенти повеќе се потпираат на недипломатско покривање, вели ФИС, и официјално генерално се опишуваат како научници, новинари или деловни раководители.
Даси рече дека очекува кинеската разузнавачка операција да се зајакне во Европа, поддржана од зголемени ресурси.
„Даваме сѐ од себе, на терен, да покажеме дека границите“ не смеат да се преминат, рече шефот на ФИС, додавајќи дека шпионските операции негативно се одразиле на меѓународната важност на Женева и се штетни за кредибилитетот на Швајцарија.
ФИС, исто така, истакна дека на безбедносната слика влијаело и растечкото ривалство меѓу големите светски сили, кое е засилено со инвазијата на Русија во Украина.
„Русија го уништи поредокот заснован на правилата за мир во Европа“, објави ФИС.
„Ефективноста на меѓународните форуми за одржување на мирот и безбедноста, како што се ОН или Организацијата за безбедност и соработка во Европа (ОБСЕ), продолжи да опаѓа; нема знаци за стабилен нов светски поредок“.
