Соединетите Американски Држави ѝ нагласиле на Москва дека Вашингтон не е вклучен во поттикнувањето на тензиите меѓу Вагнер и Кремљ, велат официјални лица, пренесе Би-би-си.
„Имаше соодветни дипломатски разговори што се случија во текот на викендот“, рече портпаролот на Белата куќа Џон Кирби, без да прецизира на кое ниво се случиле разговорите.
Тој додаде дека Вашингтон ги гледа тензиите со Вагнер „како внатрешни работи на Русија“ и не зазема страна.
Бајден останува фокусиран на поддршката за Украина, наместо да се меша во Русија, и разговараше со украинскиот претседател Володимир Зеленски во неделата, продолжи Кирби.
„Ние не сме вклучени и немаме намера да бидеме вклучени“, рече тој за моменталната ситуација во Русија.
„Она со што сме вклучени е поддршката на Украина.“
Во Стејт департментот, портпаролот Метју Милер рече дека комуникацијата го вклучува американскиот амбасадор во Русија, како и „на други нивоа овде во Вашингтон“.
Испратени се две пораки, рече тој. Првата е дека САД очекуваат Русија да го заштити американскиот дипломатски персонал во Москва, а втората – да се нагласи дека „ова е внатрешна руска работа, во која САД не се вклучени и нема да бидат вклучени“.
