Градоначалникот на Москва, Сергеј Собјанин, претстави еднократен бонус од 1,9 милиони рубљи (22.000 долари) за московските граѓани што ќе се приклучат во армијата, се вели во соопштението, пренесува Си-ен-ен.
Секој што ќе ја прифати понудата ќе заработи до 5,2 милиони рубљи (59.600 долари) во првата година од службата, се додава во соопштението.
Оние што сакаат да се приклучат на борбите во Украина можат да добијат и еднократни исплати меѓу 5.690 и 11.390 долари за повреди, „во зависност од сериозноста“, а семејството на војник убиен во акција може да добие 34.150 долари.
Додека бројот на руските жртви во конфликтот се чува во тајност, процените велат дека бројот на загинати војници е голем, вели Си-ен-ен. Само во мај и јуни најверојатно биле убиени или ранети повеќе од 70.000 војници, објави британското Министерство за одбрана на 12 јули, додека руската армија се соочува со големи загуби на новиот фронт во областа Харков.
Се проценува дека Русија изгубила 87 отсто од своите активни копнени трупи што ги имаше пред да ја почне инвазијата на Украина и две третини од своите предвоени тенкови, рекол во декември за Си-ен-ен извор што го видел декласифицираниот разузнавачки извештај доставен до американскиот Конгрес.
Социјалните мрежи се преплавени со видеа снимени со беспилотни летала на кои се гледаат руски војници мртви или оставени со сериозни рани во она што војниците го нарекуваат борби во стилот „мелница за месо“ против украинските бранители. Украинските војници често зборуваат за тоа како нивните помалобројни војници се соочуваат со т.н. напади во бранови од непријателот чии команданти се чини дека со задоволство толерираат брутални напади.
Поради зголемениот број загинати војници, Кремљ насекаде бара нови борци, за да ги испрати на фронтот, вели Си-ен-ен.
Путин ѝ нареди на војската да го зголеми бројот на војници за 170.000, со што вкупниот број на руски воен персонал ќе се зголеми на повеќе од 2,2 милиони, вклучувајќи 1,32 милиони војници, според декретот објавен од Кремљ во декември.
Ова е зголемување на руската војска за 15 проценти и е второ вакво проширување откако Путин ја започна инвазијата на Украина.
Рускиот претседател првично нареди итна „делумна мобилизација“ на руските граѓани во септември 2022 година, по серијата порази што предизвикаа обвинувања во Москва.
Мобилизацијата значеше повикување и на воените резервисти, како и дека оние со воено искуство може да бидат предмет на регрутирање.
Кампањата за регрутирање доведе до насилни демонстрации, особено во регионите на етничките малцинства во Русија, каде што беше концентрирана, и предизвика егзодус на военоспособните мажи од земјата за да избегнат војна.
И иако кампањата за мобилизација беше прекината во ноември 2022 година, откако официјални лица изјавија дека е постигната целта од 300.000 воен персонал, Русија регрутираше и борци од странство.
Така, Русија регрутираше 15.000 Непалци да се борат во Украина, од кои многумина трауматизирани го напуштиле бојното поле, додека непознат број се или исчезнати или се претпоставува дека се мртви. Еден непалски војник рекол за Си-ен-ен дека меѓу обучените во руските воени академии за странски борци има Авганистанци, Индијци, жители на Конго и Египќани.
