Силни експлозии до договорениот прекин на огнот во четири часот по локално време слушнал новинар на агенцијата Дпа во Бејрут, а Ројтерс известува дека рафалите можеле да се слушнат низ Бејрут дури и по стапувањето на примирјето во сила.
Ројтерс јавува дека има многу автомобили со раселени лица од јужен Либан, кои по прекинот на огнот почнале да се движат кон југот, кој се граничи со Израел.
Новинарите на Ројтерс виделе десетици автомобили како го напуштаат пристанишниот град Сидон јужно од Бејрут околу 4 часот наутро по локално време и се упатуваат подлабоко во јужен Либан.
Израелските одбранбени сили (ИДФ) пукаа пред прекинот на огнот во текот на ноќта врз области во близина на меѓународниот аеродром и јужниот дел на земјата.
Напади имаше и во јужните предградија на Бејрут во области каде што немаше претходна воена наредба за евакуација.
Хезболах соопшти дека истрелал ракети врз северната израелска населба Евен Менахем непосредно пред примирјето да стапи во сила, велејќи дека акцијата била за поддршка на Палестинците во Појасот Газа.
Хезболах, проиранското движење во Либан, Соединетите Американски Држави го сметаат за терористичка организација, додека Европската Унија на црната листа го стави само неговото оружено крило, но не и политичката партија што е претставена во либанскиот парламент.
Портпаролот на ИДФ за арапски јазик и медиуми ги предупреди жителите на јужен Либан, од кои илјадници ги напуштија своите домови поради тешките борби, дека израелската армија „ќе остане распоредена на своите позиции во јужен Либан“.
„Забрането ви е да одите кон селата што одбранбените сили побараа да ги евакуирате или кон одбранбените сили во областа“, напиша Авичај Адрае на мрежата Икс на арапски.
Тој додаде дека оваа мерка е за безбедност на жителите и дека ИДФ ќе ги информира кога ќе можат безбедно да се вратат дома.
Во вторникот, израелскиот безбедносен кабинет го одобри договорот за запирање на борбите на 60 дена. За тоа време Израел ќе ги повлече своите војници од јужен Либан, изјави американскиот претседател Џозеф Бајден.
Борците на Хезболах треба да се вратат зад реката Литани, околу 30 километри северно од де факто израелско-либанската граница, во согласност со резолуцијата 1701 на Обединетите нации (ОН), која го означи крајот на последната либанска војна во 2006 година, но која никогаш не беше целосно спроведена.
Извештаите велат дека вкупно 10.000 војници на либанската армија што не се вклучени во војната ќе бидат стационирани во пограничната област паралелно со израелското повлекување. Од вкупниот број, 5.000 се веќе поставени.
Договорот ќе биде надгледуван од група земји предводени од САД заедно со Франција, Либан, Израел и мировните сили на ОН УНИФИЛ.
Непосредно пред закажаниот почеток на прекинот на огнот, израелската армија објави дека убила уште еден висок припадник на палестинската милитантна група Хамас во Појасот Газа, која САД и ЕУ ја карактеризираат како терористичка организација.
Израелските воздухопловни сили „прецизно го погодија“ Мумин ал Џабари, кого го опишаа како искусен терорист во снајперската единица на Хамас, кој дејствувал во просторија во зграда што порано служела како училиште, објави ИДФ рано утрово на Телеграм.
За време на израелската војна во Газа загинаа 44.249 луѓе, а целото население на таа палестинска територија мораше барем еднаш да се пресели.
Во израелското бомбардирање во Либан загинаа повеќе од 3.800 луѓе, а повеќе од 15.000 беа ранети, соопшти либанското Министерство за здравство. На израелска страна, околу 90 војници и речиси 50 цивили се убиени од ракети и беспилотни летала во северен Израел и борбите во Либан.
