Групите за човекови права жестоко ја критикуваат одлуката на претседателот Џо Бајден да ѝ даде на Украина противпешадиски нагазни мини.
Одлуката е спротивна на ветувањето што Бајден го даде за ограничување на употребата на вакви нагазни мини во 2022 година, потсетува Политико. Бајден се подготвува да ја напушти функцијата и ја одразува зголемената загриженост на САД поради рускиот напредок на бојното поле во источна Украина.
Но иако типот на нагазна мина што тимот на Бајден ѝ ја предава на Украина има одредени заштитни мерки, групите за човекови права предупредија дека оружјето претставува посебна и долгорочна опасност.
„Антипешадиските нагазни мини се неселективно оружје што убива и сакати цивили, особено деца, со генерации по завршувањето на војните“, рече Хихем Хадрауи, извршен директор на групата за права Центар за цивили во конфликт. „Ова оружје не може да прави разлика меѓу цивили и борци како што бара меѓународното хуманитарно право.“
Бен Линден, висок функционер во Амнести интернешнел САД, рече: „Поразително и реално шокантно е што претседателот Бајден донесе таква опасна одлука со страшни последици непосредно пред неговиот јавен лик и дело да бидат запечатени за историските книги.“
Администрацијата на Бајден го бранеше овој потег по неколку основи. Забележува дека има типови на мини што по некое време стануваат инертни.
„Тие се електрично поврзани и им треба батерија за да се активираат. Кога батеријата ќе се потроши, тие нема да се активираат“, рекол американски функционер што сакал да остане анонимен.
Во јули 2023 година, администрацијата на Бајден почна да ја снабдува Украина со касетна муниција што се чуваше во големи количества во американските воени залихи од крајот на Студената војна, но на кои на САД претходно им беше забрането да ги испраќаат. САД се воздржуваа од испраќање противпешадиски нагазни мини, како овие што ги испраќаат сега, кои можат да бидат ефективни во запирање на масовните пешадиски напади со кои Украина најверојатно ќе се соочи сега кога илјадници севернокорејски војници пристигнаа во регионот Курск, пишува Политико.
Сепак, може да останат на бојното поле со генерации, некогаш и долго откако ќе заврши конфликтот.
Повеќе од 130.000 квадратни километри од Украина треба да се пребараат во потрага по нагазни мини и експлозиви, според процените на украинската влада, површина поголема од Англија, вели Политико.
Бајден во 2022 година издаде ново правило за забрана на американска употреба или трансфер на противпешадиски мини надвор од Корејскиот Полуостров, откако тогашниот претседател Доналд Трамп во 2020 година ги отфрли ограничувањата од времето на Обама за американска употреба на мини.
Последната одлука ја нагласува зголемената нелагодност во администрацијата на Бајден поради очајната ситуација на бојното поле, бидејќи Русија остварува бавен и скап, но постепен напредок против силите на Киев во источна Украина.
Одлуката за нагазна мини следи по уште еден пресврт кај Бајден: тој неодамна се согласи да ѝ дозволи на Украина да ги користи ракетите со долг дострел обезбедени од Америка за напади длабоко во Русија по неколкумесечниот притисок од Украина и нејзините најсилни поддржувачи на Запад.
САД, исто така, побараа од Украина да ја ограничи употребата на мините – да не ги распоредува во областите населени со украински цивили и да ги користи на своја територија. Целта на мините е да го ограничат рускиот напредок на украинска територија, особено на исток.
Русија, за која САД велат дека користи долготрајни мини, постави илјадници такви експлозиви низ цела источна Украина, каде што освои значителни територии.
Повеќе од 160 земји од 1997 година потпишаа меѓународен договор со кој ветија дека ќе го забранат производството, складирањето и преносот на противпешадиски нагазни мини. Украина е потписник на договорот, но САД и Русија не се.
