Забраната за посвојување ќе влијае на најмалку 15 земји, меѓу кои и некои европски земји, Австралија, Канада и Аргентина. На американските граѓани им е забрането да посвојуваат руски деца од 2012 година. Спроведувањето на забраната во некои земји би можело да биде сложено бидејќи, на пример, САД во одредени региони забрануваат обезбедување медицинска нега поврзана со промена на полот, додека во други региони не.
Според извештајот на Советот на Европа за 2024 година, 26 земји обезбедуваат „делумен пристап“ до негата за промена на полот, додека пристапот во голема мера е ограничен во 14 земји. Еден од авторите на новиот закон, претседателот на долниот дом на рускиот парламент, Вјачеслав Володин, претходно изјави: „Исклучително е важно да се отстранат можните опасности во форма на промена на полот на кои би можеле да бидат изложени посвоените деца во тие земји“.
Руските пратеници, исто така, воведоа законски мерки против медицинските процедури за промена на полот во земјата. Минатата година тие ги забранија медицинските процедури поврзани со промена на полот, додека највисокиот суд во земјата го означи ЛГБТК+ движењето „екстремистичко“. Во 2022 година, Путин потпиша закон со кој се забрануваат сите ЛГБТК+ содржини.
Според извештајот на руското Министерство за надворешни работи од 2023 година, руските експерти проценуваат дека државјаните на САД посвоиле меѓу 66.000 и 68.000 руски деца. Бројот на руските деца посвоени од странски државјани се намалува од 2012 година, кога беше воведена забраната за американски државјани, јави руската државна новинска агенција ТАСС.
